POSTU SAUDE LUKULAI FALTA MEDIKU

Postu Saude Lukulai, Suku Darolete, Postu Administrativo Liquiça Vila, Munisipiu Liquiça, menus tebes Mediku ka pesoal saude, tanba ne’e maka Xefi Suku Darolete, Napoleão dos Santos, husu ba Governu liu husi Ministeriu Saude atu aumenta tan pesoal saude.

“Ami iha ne’e mediku ida deit, feto tan ne’ebe nia labele la’o mesak ba iha fatin sira dok, tanba ne’e maka husu atu aumenta tan pesoal saude hodi ami iha Postu Saude ne’e,” hateten Xefi Suku Darolete Napoleão dos Santos, bainhira halo dialogu ho membru Parlamentu Nasional (PN), Komisaun F, Kinta (08/10/2015).

Iha fatin hanesan, Mediku Gina Remigia R. dos Santos, hatutan tan katak, nia hala’o kna’ar nudar mediku desde kedas tinan 2014.

“Hau mesak los iha postu saude ne’e, hau atende populasaun suku rua, kona ba moras normal no partus mos hau mak atende hotu, kuandu dok oitoan sira mak mai deit, tanba sira hela dok tebes, tanba ne’e maka hau presija tan infermeira ida no parteira ida hodi nune’e bele ajuda hau atende pasiente,” hateten Gina dos Santos.

Gina serbisu tinan ida ona hafoin remata eskola iha Universidade Nasional Timor-Leste (UNTL), oras ne’e dadauk nia hela iha postu saude ne’e kuandu husi nasional ka munisipal presiza urjente mak tun.

“Hau Liquiça oan duni ne’ebe hau mai iha ne’e deit, uluk hau ho hau nia laen, mais nia ba fali eskola saude nian iha Dili, ne’ebe hau mesak, hau sente serbisu todan tanba hau mesak, maske todan mais hau ho pasiensia hodi atende sira ho diak,” Gina lia tun ba membru Parlamentu Nasional husi Komisaun F. v

Gina dehan, durante nia halo tratamentu moras ne’ebe mak sa’e maka’as iha postu saude mak Ispa. Hahuu husi Segunda to’o Kuarta, pasiente barak kuaze to’o lima nulu, mais kinta-sesta menus tebes.

Hatan ba preukupasaun ne’e, Xefi delegasaun Komisaun F, Parlamentu Nasional, Eduardo de Deus “Dusae”, hateten katak, los duni presiza aumenta tan infermeira no parteira hodi nune’e bele ajuda.

“Presiza aumenta tan infermeira no parteira, se lae, kuandu ema isin rua no mos moras mak mai barak, mediku ida deit atende la dun diak,” dehan deputado Bankada CNRT ne’e.

Deputada Ilda da Conceição no deputada Domingas “Bilou Mali” hatutan tan, presiza aumenta duni hodi nune’e bele atede lalais pasiente sira kuandu moras ninia volume sa’e maka’as. Difikuldade ne’ebe mak Deputado komisaun F sira detekta iha postu saude ne’e maka falta tebes be’e mos. mia

Jornal Nacional