ESTUDANTE KOALIA TETUN MULTA DOLLAR 1, LA EDUKATIVU

Eskola iha Timor, liuliu eskola públiku balun kapital Dili laran hatúr nia regulamentu, katak iha resintu eskola nian estudante tenke koalia lian Portugues, karik koalia Tetun sei hetan multa dolar ida (U$ 1.00). Maibe politika ida ne’e  sosiedade nomos estudante Universitarius balun lakonkorda ho sansaun refere tanba konsidera regulamentu ne’e la’os edukativu.

Relasiona ho asuntu refere, Kordenador Jeral Comunidade Juventude Enjenaria (CJE), Osorio Jeronimo hateten, eskola balu estudante koalia Tetun multa U$ 1.00 neé sai topiku no konsege sai trending (namanas-red) hafoin media sira publika.

“Ema barak fo ona nia komentariu, positivu i balun mos bele dehan negativu,  ne’ebe fo komentariu positivu mak konsidera regulamentu refere diak tanba bele haka’ás estudante sira hodi abitua ho Portugues mak daudaun núdar lian oficial. Maibe iha ema barak mos la konkorda tanba lian Tetun mos núdar lian oficial alem de portuges neébé konsagra ka temi ona iha kostituisaun Repúblika Demokratika Timor Leste (RDTL) artigu 13 alinea 1,” haktuir Osorio ba jornalista JNDiário iha nia kna’ar fatin Becora Dili, Domingo (17/07/2016).

“Ha’u nia hanoin laos ida ne mak sai kestaun ba regulamentu ida ne’e, tanba lingua rua neé i kuaze importante atu dezenvolve iha nivel edukasaun hotu-hotu no liu-liu ba estudante sira,” argumenta Osorio.

Tanba neé, Osorio enkoraza katak, mestre no mestra sira iha eskola hakarak implementa regulamentu hodi regula nia estudante neé presija edukativu no hakonu valor positivu i forma karakter tuir edukasaun neébe labele hamosu fali preokupasaun públiku.

Eskola, mestre no mestra sira neébe hala’o atividade formasaun, tenke buka hodi halo regulamentu ne’ebé bele haforsa vizaun no misaun edukasaun ne rasik, tantu eskola públiku no eskola privadu, no antes atu fo sai regulamentu ruma tenke haree ba substansia regulamentu ne’e ninia implaku ba alunus sira ninia futuru, husu Osorio.

Osorio argumenta klean no lori asuntu neé liga ba kondisaun real katak, dadaun Timor Leste hasoru dezafiu bo’ot  ba servisu Governu mak konaba osan. Jestaun orsamentu neébe ladiak, no korupsaun neébe mak labele trava ona maske Estadu no Governu rasik forma ona CAC (Comição Anti Corupção) no seluk tan. Entaun ho regulamentu “koalia tetun estudante multa U$ 1.00”, neé duvidas tebes ba eskola sira neébe hatúr nia regulamentu nuneé.

“Ha’u tauk tebes, estudante ne’e ba bosok inan-aman katak iha eskola ami nia mestre husu ami hatama dollar ida hodi halo foto kopia ba materia no seluk tan,” katak Osorio.

Mestre no autoridade eskola nian, tenke hanoin katak, sira (mestre no autoridade eskola) mak núdar sasukat ida ba estudante (joven)  sira nia futuru, liu-liu relasiona ho karakter no dedikasaun estudante ninian iha ambiente foun ba futuru, salienta Osorio.

Tuir nia, eskola sira neébe adopta ona presija melhora regulamentu, tanba konsidera regulamentu refere loke ka fó dalan ba lalabarik (estudante) sira hodi apriende bosok ten, bosok inan-aman, i signifika regulamentu neébe laiha vantajen, sem dedikasaun moral, no la edukativu. Maibe regulamentu hirak neé mak kontinua ba futuru, fiar katak aban-bainrua, Timor Leste hakonu bosok ten.

Tanba neé eskola sira presija regulamentu neébe bele haforsa labarik sira nia mental, atetude diak, kreatividade, atu bele sai ema diak iha futuru.

Osoio ne’ebe núdar dosente iha UNITAL ne’e, fó ezemplu katak, uluk sira eskola mestri sira dehan, “se ita hakarak kuda aihoris ruma, labele halo kleuk wainhira nia sei nurak tanba nia bele sai kleuk aat liu tan wainhira tuan iha tempu tuan (katuas)”.

“Ha’u bele sujere ba eskola ne’e karik, tuir lolos eskola tenke estabelese regulamentu ne’ebé bele haforsa estudante ninia kreatividade, exemplu “tanba ne’e, estudante viola regulamentu ruma presija haruka estudante ne’e hodi hakiak aifunan ruma (halo pot bunga) ou kuda aifunan iha eskola nia resintu (kompleksu), hamos aula (ruang ekola) i ho meius ne’e mak bele dehan edukativu,”dehan nia.Ito

Jornal Nacional