KONFIANSA XANANA HALO TUSAN BARAK – HOTEL BECORA SEI NAKONU

Sekretariu Jeral Partidu FRETILIN, Mari Alkatiri, hateten katak, tusan barak ne’ebe agora Estadu selu ho Orsamentu Rektifikativu US$ US$ 390,7 milhoens ne’e, tanba halo husi ema sira ne’ebe maka eis Primeiru Ministru (PM), Kay Rala Xanana Gusmão, fo konfiansa.

“Foin loron hira ba kotuk ita aprova Orsamentu Rektifikativu US$ 390,7  milhoens, osan barak atu selu tusan deit, tusan ita lahatene se mak halo, maibe Estado tenke asume, ema sira ne’ebe halo tusan ne’e riku matak deit no Estado mak tenke selu,” hateten Sekretario Jeral partidu FRETILIN, Mari Alkatiri, bainhira partisipa iha konsolidasaun partidu FRETILIN nian iha Aldeia 4 Setembro, Suku Comoro, Postu Dom Aleixo, Munisipiu Dili, Domingo (17/07/2016).

Mari Alkatiri dehan, tusan ne’ebe mak iha, ema sira ne’ebe mak Eis Primeiru Ministru (PM), Kay Rala Xanana Gusmão, konfia maka kria no hodi kungfu fali Xanana para hamosu tusan barak ba Estado.

“Ema sira bai-bain Xanana konfia ne’e maka kungfu fali Xanana hofi halo tusan, tanba ne’e maka FRETILIN tenke hamutuk,” dehan Mari Alkatiri.

 Sekretario Jeral FRETILIN ne’e husu ba ninia militantes sira atu hamutuk ho Estadu atu selu tusan ne’ebe mak iha, maibe ema hirak ne’ebe halo tusan tenke tuir prosesu justisa.

“Ita hotu hamutuk selu tusan ne’e, maibe ema sira halo tusan ne’e tenke tuir prosesu no tenke ba tribunal, la’os hatama tiha osan sira ne’e ba sira nia bolsu, depois Estado mak selu fali. Ita selu ba maibe justisa tenke iha, hotel Bekora sei nakonu, tanba ne’e maka sira tauk FRETILIN ukun fali rai ida ne’e, tanba razaun rua, ida mak sira lakohi kore povu husi kiak, ida mak sira lakohi atu ba tribunal, ne’e mak sira koalia bar-barak,” afirma Alkatiri.

Atual prezidente Zona Ekonomia Especial Sosial Merkadu (SEESM) ne’e afirma tan, eis Primeiru Ministru, Xanana entrega ukun ba FRETILIN atu hamutuk ho FRETILIN, para atu kurizi sasan lubuk ida iha ukun ne’e nia laran.

“Ita FRETILIN la tama iha Governu, mais ita loke dalan para ita nia kuadru sira atu ajuda kurizi sasan, ita vota afavor ba OR para apoia hodi selu tiha tusan ne’e, atu nune’e iha tinan 2017 ita ukun tusan sira ne’e laiha ona. Iha tinan 2017 hahu ho politika, planu, programa nia lideransa FRETILIN nian hodi ukun rai ida ne’e, ne’e maka ita prepara dadauk,” hateten Alkatiri.

Sei hamosu impaktu negativu

Husi sorin seluk eis Prezidenti Republika (PR), José Ramos Horta, hateten katak, Governu husu OR US$390,7 mihoens diak, maibe impaktu sei negativu ba Fundus Petroleu.

“Hau la’os hateten sala ka los, mais hau atu hateten deit katak Primeiru Ministru, Rui Maria de Araujo no maun Xanana mak tenke sukat didiak, esplika didiak para povu hatene tanba ne’e responsabilidade boot teb-tebes, hau lahetene oinsa mak ita ekonomia bele absolve, hau hatene orsamentu ne’e atu ba Portu Tibar, mais hau hanoin impaktu sei negativu ba ita nia fundus petroleu,” hateten Ramos Horta hodi responde Jornalista sira, bainhira partisipa kolheta ikan iha area Dolok oan-Cristu Rei, Dili, Sabado (16/07/2016).

Laureado Nobel da Paz 1996 ne’e hateten, pedidu husu OR ne’e responsabilidade Primeiru Ministru, Rui Maria Araujo no Ministru MPIE Xanana Gusmão.

“Sira nain rua mak tenke esplika ba povu tanba sa mak presija Raktifikativu ida, oinsa maka Timor rai ida ki’ik, ekonomia ki’ik los, orsamentu 2016 sa’e ona ba US$ 2 bilhoens, ne’e bele inpaktu ba inflasaun no fundu soberanu ka fundu petroliu,” dehan Horta.

Kona ba dividas, eis Prezidente Republika ne’e dehan, nia lakonhese detalhus ba negosiasaun dividas emprestimu ne’e, katak emprestimu ne’e jurus hira los.

“Ita halo divida ne’e la’os problema, mais importante haree kondisaun emprestimu ne’e ba saida, ne’ebe hau lahatene no hau labele fo komentar klean,” dehan Horta.

OR ne’e atu selu mos dividas sira ne’ebe mak iha tinan 2013, tuir Horta katak, ne’e la’os responsabilidade Primeiru Ministru, Rui Maria de Araujo nian, tanba divida sira ne’e mosu nia seidauk asume kna’ar xefi Governu. mia

Jornal Nacional