Konstrusaun Edifisiu Fabrika Heineken Atinji 25%

Manager Kompania Heineken, Florentino Jimmychayono, hateten konstruksaun ba uma fabrika (bebidas) Heineken ne’ebe harii iha Metinaro agora dadaun foin atinji 25%.

Nia hateten, instalasaun prioridade ne’ebe presiza konstrui uluk mak fatin ga edifisiu produsaun ba bebidas nian, tanba iha tinan ida ne’e (2016) tenke hahu produs bebidas ona.

“Mesin sira ne’e sei mai iha fulan Agostu, Setembru no Outubru hahu monta ona ekipamentus, iha Novembru trail enkuantu iha Dezembru hahu halo produsaun primeiru,” Diretor Jimmychayono hateten, iha Dili.

Nia dehan, foin lalais kompania hatama tiha ona tanki 13, nune’e bainhira produsaun la’o ona bele enxe bebidas iha tanki ne’e.

Nia hateten,Heineken sei produs bebidas oin-oin hanesan beer bintang, tiger, sagres, ABC, gandum, sprite inklui mos coca-cola.

“Bebidas sira ne’e ita sei uza bee 98% no bee sira ne’e husi timor, maibe gandum ne’e bahan husi Australia,” nia hateten.

Antes ne’e, nia dehan, kompania Heineken asina ona akordu ho governu Timor-Leste iha dia 8 Janeiru 2015 hodi loke sira nia fabrika iha Timor.

Iha fatin seluk Ministru Koordenadora ba asuntus Ekonomiko no Ministru Agrikultura e Peskas,  Estanislau da Silva, hateten Kompania Heineken hatudu ona sira nia reputasaun diak no kualidade iha produsaun bebidas iha mundu internasional.

“Timor –Leste konkorda ho kolaborasaun servisu ida ne’e no investimentu ida ne’e sei fo vantagen ba rai ida ne’e,” nia hateten.

Nia garantia, wainhira fabrika ne’e finalize, Timor oan lubuk ida mak sei servisu iha ne’eba.

“Sira presiza ema barak tanba kompania ne’e sei produs bebidas kada loron 600 mil litrus,” nia hateten.

Iha fatin seluk komunidade Joaquin dos Santos, agradese tanba wainhira fabrika ne’e finalize sei loke kompo trabalho lubuk ida ba timor oan.

“Hau agradese tanba bele fo servisu ba timor oan sira,”nia agradese.

The Dili Weekly