Abel Ximenes: Nasaun Atu Bá Oin Depende Edukasaun

DÍLI, (ANTIL) - Vise-ministru Edukasaun Asuntu Ensinu Sekundáriu no Tékniku Vokasionál, Abel da Costa Ximenes iha nia intervensaun ba abertura Espozisaun Kareira Profisionál no Empregu 2016, SEFOPE iha Dom Bosco, Comoro, Díli, Kinta (27/10), hateten, atu nasaun ne’e bá oin depende ba edukasaun.

“Tanba ne’e, tenke mellora edukasaun tanba edukasaun mak mellora nasaun. To’o ona tempu atu  brani halo koresaun. ” Buat ne’ebé la di’ak ita kuriji no korajen buka métodu ne’ebé mak di’ak hodi hadi’a. Buat ne’ebé di’ak ita hadi’a tan, hametin liutan no buat ne’ebé ladi’ak, tenke . Nune’e, sestu Governu avansa dekonversaun husi Ensinu Sekundária Jerál ba Tékniku Vokasionál,”  ministru akresenta.

Tuir nia observasaun, durante tinan ida resin komesa iha ona rezultadu komesa di’ak. Durante VI Governu konstitusionál nia ukun, eskola iha teritóriu TL aumenta no no númeru estudante mós aumenta.

Nia apela ba estudante Sekundáriu sira ne’ebé atu remata estudu, atu hili eskola universidade ne’ebé di’ak no akreditadu husi Governu ho kategória A no B. ” Hili ida ne’ebé la akreditadu sei kontribui ba númeru dezempregu,” nia dehan tan.

Iha fatin hanesan, durante abertura Espozisaun Kareira Profisionál no Empregu 2016 ne’e, Sekretáriu Estadu Politika Formasaun Profisionál Empregu (SEPFOPE), Ilídio Ximenes hateten, espozisaun kareira atu fahe informasaun ba estudante sira, kona-ba prepara aan didi’ak atu bele hetan moris di’ak iha futuru.

“SEPFOPE serbisu hamutuk ho parte hothotu, liliu Ministériu Edukasaun oinsa bele forma ema ne’ebé mak kreativu no iha skill, hodi bele buka moris iha aban bainrua,’’  Ilidio afirma.

Espozisaun Kareira Profisionál no Empregu 2016 ne’e loke direta husi Sekretáriu Estadu Konsellu Ministru , Avelino Coelho, Sekretáriu Estadu Komunisaun Sosiál, Nélio Isaac Sarmento no Vise Ministru Edukasaun Ensinu Sekundáriu no Tekniku Vokasionál, Abel da Costa Ximenes. Partisipa mós husi  Diretór  Jerál SEFOPE, Jacinto Baros,estudante ensinu jerál no vokasionál no seluk tan iha Dili laran.

Atividade ne’e hala’o durante loron rua, Kinta 27-28 Outubru 2016.  Atividade ne’e mós  hala’o ona iha munisipiu hotu no finaliza Díli. (Jornalista: Rafy Belo;  Editora: Rita Almeida)

Foto: Vise-ministru Edukasaun Asuntu Ensinu Sekundáriu no Tékniku Vokasionál, Abel da Costa Ximenes