Governu Kontinua Impresta Osan, La Lori Mudansa Ba Povu Nia Moris

DILI, (ANTIL) -  Governu halo ona kompremisiu iha Orsamentu Jeral Esradu (OJE) 2017, atu kontinua impresta osan. Maibé, deputada Josefa Pereira dehan, maske  impresta osan barak ba dezenvolvimentu, la lori mudansa ba  povu nia moris.

Proposta Orsamentu Jerál do Estadu tinan 2017, VI Governu lideradu Primeiru Ministru Rui Maria de Araujo husu osan hamutuk USD $ 1.387 biliaun. Husi total ne’e, osan husi imprestimu  USD $ 101.826 milioens.

“Desde tinan 5 liuba, Governu sempre impresta osan hodi ezekuta projeitu boot sira ne’e. Maibé nia uzu ne’e mak sei atrazadu hela,” Deputada FRETILIN, Josefa Pereira informa asuntu ne’e ba ANTIL iha Parlamentu Nasionál foin lalais ne’e.

Entre fontes imprestimu husi sira mak Asian Development Bank (Banku Dezenvolvimentu Asia). ” Maibé realidade Governu la uza osan ho  efisiente, tanba menus kapasidade rekursu humanus atu halo supervizaun no kontrolu,” nia dehan tan.

Tuir nia observasaun, implementasaun ba projeitu auto estrada, projeitu tasi-mane no drainajem iha Dili, barak sei atraza. Tanba osan balun ne’ebé impresta iha tinan 2015, to’o ohin-loron seidauk implementa tanba hein desizaun hosi Tribunál Kontas. Deputadu ne’e mós  husu atu la bele uza osan imprestimu, bainhira  seidauk iha  planu di’ak hodi atinji metas ne’ebé difini ona.

“Estadu dehan mukit tun ba 41%, maibé tuir ami nia fiskalizasaun ne’e mukit ho ki’ak ne’e tun iha parte konsumu de’it, la’ós ba hotu-hotu,” Josefa observa.  (Jornalista: Manuel Pinto/Editor: Otelio Ote)

Foto: Josefa Pereira Deputada FRETILIN