Konstrusaun KJ, Komandu PNTL Husu Komunidade Kopera

DILI, (ANTIL) – Komandante Komandu Administrasaun, Superintendente Xefe Mateus Fernandes hatete, futuru konstrusaun edifisiu Kuartel Jerál (KJ) Polísia Nasionál Timor-Leste (PNTL) iha Kaikoli sei afeita uma kain hamutuk 11, nune’e nia husu atu komunidade sira kopera ho governu hodi aselera prosesu.

“Husu ba uma kain 11 ne’ebé maka seidauk kopera governu, la-taka dalan ba imi atu rezista, se lalais liu entaun di’ak liu tanba, ami fó ona prazu loron, kuandu hein kle’ur liu maka orsamentu bele fila fali ba kaixa estadu,” Mateus Fernandes informa liuhosi konfrensia imprensa iha KJ Kaikoli foin lalais ne’e.

Nune’e mos, Diretór Interinu Diresaun Nasionál Terras Propriedade Servisu Cadastral (DNTPSC) Gabriel C de Araujo hatutan, komunidade afetadu uma kain 21 ne’e uma kain hitu maka kopera hodi asina kontratu indimizasaun ba uma no ai-horis.

“Ami finaliza ona no lori dokumentu mai entrega iha komandu jerál PNTL, no uma kain 11 seidauk koopera,” Gabriel C de Araujo haktuir.

DNTPSC halo ona faze prosesu orsamentu ba finansas hafoin sira nia orsamentu tama iha sira nia konta bankaria maka ekipa sei fó notifikasaun no husu sira hamamuk fatin bazeia ba kontratu ne’ebé maka iha, no sira ne’ebé ba kopera sei halo despezu administrativu.

Totál orsamentu ne’ebé maka aprova ba komunidade afetadu hamutuk $362.147,21, orsamentu ba kada familia depende ba avalisaun ekipa Ministériu Obras Publikas halo no ba komunidade sira ne’ebé halo reklamasaun bele hato’o ba tribunál no parte governu haree atu rezolve.

Indimizasaun sei refere ba uma no ai-horis, kona-ba rai sei tuir mai tanba lei rai sei iha prosesu diskusaun iha Parlamentu Nasionál, bainhira lei ne’e aprovadu no promulga maka sei regulariza tuir lei ne’e.

Dialogu no enkontru aproximasaun ho komunidade afetadu hala’o husi ekipa interministerial kompostu Ministériu Justisa, liliu DNTPSC, Ministériu Obras Publikas, Ministériu Agrikultura no PNTL hanesan nain ba projetu hahú halo prosesu ne’e desde 2014 to’o agora.

Ekipa konsege rekolla uma kain 18, prosesu to’o ohin loron uma kain hitu maka kopera ho governu liu husi akta-akta enkontru no rezolusaun husi governu iha loron 5 Outubru tinan 2016. (jornalista: Manuel Pinto; editora: Rita Almeida)

Foto: Superintendente Xefe Mateus Fernandes.