EMILIA TINAN 7 NO MADALEN TINAN 4 PRIZAUN

Jornal Nacional, editorial

Tribunal Distrital Díli iha  Segunda (20/12/2016) deside pena prizaun  7 ba arguida Emilia Pires, eis Ministra Finansas no tinan 4 ba arguida Madalena Hanjam eis Vise Ministra Saúde, tanba komete krimi partisipasaun ekonómiku  iha negosiu, artigu 299 kodigu penal Timor Leste.

Ho dezisaun tribunal nian nebe kondena eis governates nain rua nee, hatudu katak durante nee tribunal kondena ona eis membru governu komete korupsaun hamutuk ema nain 4,eis Ministra Justisa, Lucia Lobato ikus mai hetan indultu Presidente Republika,  eis Ministru Edukasaun, João Cancio Freitas sei iha prosesu rekursu inklui eis Ministra Finansas, Emilia Pires no Madalena Hajamh no mos  membru governu balu sei iha prosesu nia laran.

Hakarak ka lakohi, simu ka la simu dezisaun nee tun ona, dezisaun Tribunal Distrital Dili nee justu ka la justu nee kompete ba advogado atu bele hatoo rekursu ba Tribunal Rekursu hodi reve fila fali dezisaun tribunal distrital ninian nee.

Laiha duvida tan katak advogado Emilia ho Madalena Hajam nian sei apresenta rekurus kontra dezisaun Tribunal Distrital Dili nian. No prosesu julgamentu iha Tribunal Rekursu mak sei lori tempo naruk tamba laiha juiz hodi prosesa rekursu sira nee.

Lahatene verdadeiro falta juis iha Tribunal Rekursu maibe realidade katak kazu eis Ministru Edukasaun apresenta rekurus liu tinan ida ona nebe too ohin loron Tribunal Rekursu seidauk toma dezisaun tamba laiha juis hodi prosesa rekursu sira nee.

Antes nee Ministeriu Publiku akuza krime rua, krime administrasun da noza ne’ebé previstu iha artigu 274 kodigu penal ho krimi partisipasaun ekonómiku iha negosiu ne’ebé previstu iha artigu 299  númeru 02 kodigu penal ba Emilia Pires ho Madalena Hajam.

Maibe tuir  tribunal nia haree ba konkursu aperente katak, krimi ne’ebé ho nia natureza la hanesan maibe prezuizu hanesan, tan nee tribunal tenki desidi hodi absolve tiha krimi administrasaun da noza aplika deit krimi participasaun ekonomiku iha negosiu ba arguida sira.

Tribunal mos deside la selu indeminizasaun ruma ba Estadu, tanba arguida nain rua la halo prezuizu ruma ba Estadu, maske antes ne’e iha akuzasaun husi Ministeriu Publiku nian katak, arguida nain rua halo prezuizu ba Estadu  relasiona ho uza osan Estadu  hodi sosa kama ba hospital nasional no referal sira, maibe la uza.

Dezisaun foin mai husi tribunal primeira instansia tamba kondenado nain rua nee tribunal fo tempo loron 15 atu apresenta rekursu nian ba Tribunal Rekurus. Too data rekursu nian termina, kondenada sira la apresenta rekursu mak tribunal fo ordem ba polisia lori kondenada sira ba prizaun hodi kumpri dezisaun nebe iha.

“Agora ha’u hanesan Vise Ministra (Uluk), iha kompetensia atu haree ba servisu hospitalares, politika ekipamentus hospitalares nian, se kama  ne’e tekniku sira dehan diak, PM mos aprova osan no pois aprova mos single source, entaun ha’u Vise Ministra tenki ezekuta…., tanba ne’e ha’u sei  hatama rekursu kona ba ida ne’e,” Madalena Hanjam.

Los duni senhora, apresenta rekursu ba Tribunal Rekursu tamba artigu nebe Ministeriu Publiku uza hodi kondena senhora mak krime administrasun da noza ne’ebé previstu iha artigu 274 kodigu penal maibe ikus mai tribunal absolve.

Agora duvida mak nee tribunal foti ona dezisaun maibe oinsa se kondenada, Emilia Pires dadaun nee iha hela estranjeiru, seidauk fila mai Timor Leste eh lakohi ona atu mai Timor Leste hodi koopera ho justisa.

Karik kordena ho Internasionap police hodi kaptura ka halo akordu ekstradisaun hodi lori ema sira nebe komete krime iha rai laran nebe ba sadera an ka iha nasaun seluk hodi la kumpri dezisaun tribunal nian.

Agora Emilia ba liur lakohi mai Timor Leste nee tuir lolos responsabilidade governo nian tamba governu mak haruka Emilia ba partisipa g7+ hodi lakohi fila mai timor. Keta halo ba iha konspirasaun ruma hodi nunee Emilia  Pires sai ba liu lakohi fila mai timor, lahatene los. *