quinta-feira, 12 de janeiro de 2017

Dom Basilio : Eis-Titulár Sira Tenke Moris ho Kondisaun

Dili, (ANTIL) – Relasiona ho alterasaun Lei Pensaun Vitalisia iha Parlamentu Nasionál (PN), Amu Bispu Dioseze Baucau, Dom Basilio do Nascimento hateten, eis-titulár sira tenke moris ho kondisaun tanba estadu rekoñese sira nia direitu atu hetan asisténsia bazeia ba aprovasaun lei hosi PN.

“Tanba sira titulár ona tenke moris iha kondisaun, la’os ita mak diskute tun sa’e maibé sira balun ne’ebé la hetan previlejiu mós ladun di’ak tanba orsida dehan, nusa mak sira simu no ha’u ne’e labele simu,” informa Dom Basilio do Nascimento ba jornalista sira hafoin hasoru malu ho Primeiru Ministru hodi koalia kona-ba akordu Timor-Leste ho Santase iha Palacio do Governo, Kuarta, (11/01/2017).

Alterasaun lei pensaun vitalisia ne’ebé durante ne’e públiku kestiona, PN halo mak redusaun no elimina direitu regalia sira balun, maibé la elimina totál Lei Pensaun Vitalisia.
Ho nune’e Lei Pensaun Vitalisia alteradu ba oin hamenus regalia sira balun hanesan, direitu atu hetan pasaporte diplomátiku, direitu injensaun ba taxa iha materiál konstrusaun, direitu asisténsia médika la bele involve família.

Pensaun Vitalisia ba salariu eis-titulár no eis-deputadu sira simu iha redusaun hosi salariu 100% hosi eis-titular mandatu dala tolu tun ba 90%, ba mandatu dala rua redus ba 65% no primeiru mandatu de’it redus ba 60%.

Jornalista: Zezito Silva / Editor: Gantry Meilana

Foto: Deputados do Parlamento Nacional na votacao final global da proposta de alteracao a Lei de Pensao Vitalicia, na quarta-feira (10/01/2017). Foto ANTIL/Antonio Goncalves

Sem comentários: