Ba Futuru Governu Iha Posibilidade Halo Rezidensia Ba Professores

DILI – Maske agora governu liu husi Ministeriu Edukasaun (ME), seidauk bele halo dormitoriu ou rezidensia ba professores sira neebe mak hela dook husi area eskola, maibe iha futuru governu iha posibilidade bele implementa.

Tuir Direitor edukasaun Munisipiu Baucau, Januario Cabral katak, professor sira neebe mak hela dook husi area eskola nia presentajen kiik, tanba tuir sira nia akompaniamentu durante nee, iha professor ida rua maka dala ruma mai tarde.

Agora iha programa ida PNDS hanoin iha inisiativa ida diak, tanba nee ba futuru nee iha ona hanoin ida atu bele halo rezidensia ba professor sira, tanba agora PDNS foin atu hahu, liu-liu iha eskola remotas sira nee, hodi aumenta sala, neebe hau hanoin tinan rua ba oin nee iha ona posibilidade  para  bele halo ezidensia ba professor sira. Total eskola sekundaria jeral hamutuk 12, ensinu baziku sentu e noventa,” dehan Januario ba STL hafoin partisipa iha seremonia avaliasaun orsamentu 2016 no planu melloramentu servisu 2017 iha edifisiu INFORDEPE Balide, Dili, Kuarta (11/01/2017).

Iha fatin hanesan, Direitor Jeral husi Ministeriu Edukasaun, Antoninho Pires dehan, dormitoriu sira iha duni programa, maibe agora sira sei tau perioridade ba iha sala prosesu aprendizajen, maske rezidensia ba professor nee sira tau iha programa, maibe sira sei tau perioridade liu ba iha sala no laboratorium.

Nunee mos vise Ministra edukasaun, Dulce Jesus hatete, rezidensia ba professores sira nee mos importante, tanba nee, Ministeriu tau iha planu, seidauk implementa, tanba preokupasaun sira seluk neebe mak Ministeriu atu bele halo mak hanesan aumenta sala, fasilidade eskola, inklui mos formasaun ba professores sira. Informasaun kompletu iha STL Jornal no STL Web, edisaun Sesta (13/1/2017). Jacinta Sequeira/Guilhermina   Franco

Suara Timor Lorosae