quinta-feira, 12 de janeiro de 2017

Esplorasaun Minarai iha Tasi Timor Suspendidu

PARTILHAR
DILI (ANTIL) - Esplorasaun minarai iha Tasi Timor temporariamente suspendidu durante Governu Austrália no Timor-Leste halo negosiasaun ba fronteira marítima entre Austrália no Timor-Leste.

“Enkuantu prosesu negosiasaun ne´e sei la´o, seidauk ko´alia kona-ba sé maka atu esplora. Klaru katak durante ida ne´e kompañia boot sira hanesan Woodside ho sira seluk maka hetan títlu ka indikadu tiha ona maibé agora sira seidauk bele hahú esplorasaun tanba sei iha indifinisaun. Seidauk klaru parte ne´ebá ne´e pertense ba sé,” Primeiru Ministru (PM), Dr. Rui Maria de Araújo dehan ba jornalista sira iha Palásiu Prezidénsia Repúblika, Bairu-Pité, Dili, Kinta, hafoin inkontru ho Xefi Estadu Taur Matan Ruak.

Nia esplika katak hapara esplorasaun minarai ne´e la implika ba Orsamentu Jerál Estadu (OJE) tanba iha fonte orsamentu seluk atu sustenta OJE. PM prefere haloos tiha fronteira maka bele esplora nune´e Timor-Leste bele hetan ninia direitu pursentu 100 tuir lei internasionál.

Durante inkontru ho Prezidenti Repúblika Taur, nia haktuir, Prezidenti mós husu esklaresimentu hosi Governu kona-ba kuandu hapara Certain Maritime Arrangements in the Timor Sea (CMATS) ne´e ninia implikasoens saida de´it. PM Rui hatán, implikasaun boot liu maka ho prosesu CMATS ne´ebé ita hapara, loke dalan fila fali atu ita negósia fali ita nia fronteira.
“Prezidenti mós informa ba Governu katak nia (prezidenti) simu ona rezolusaun Parlamentu hodi hapara tratadu CMATS ho Austrália. Prezidenti maka iha kompeténsia tuir konstituisaun haruka publika iha Jornál Repúblika para sai hanesan válidu,” PM Rui haktuir.

“Lori governu nia naran ha´u esplika ba Prezidenti Repúblika, ita hein katak prosesu delimitasaun difinitiva ba ita nia fronteira marítimas bele la´o ho di´ak durante tinan ida ne´e. Parte rua hatudu ona boa vontade. Governu hato´o mós ba Prezidenti Repúblika katak ne´e sinál di´ak ida tanba durante ida ne´e iha rekuza ka rezisténsia hosi Austrália lakohi túr negósia maibé agora governu Austrália hatudu vontade ne´ebé di´ak. Ita felisita no apresia governu Austrália nia desizaun ida ne´e,” nia hatutan.

Jornalista: Xisto Freitas / Editór: Gantry Meilana

Foto: Primeiru Ministru, Dr. Rui Maria de Araújo
PARTILHAR

Author: verified_user

Publicação luso-timorense sem fins lucrativos

0 comentários: