Hari KJ PNTL, Komandu Husu Uma Kain 21 Kaikoli Atu Kopera

DILI (ANTIL)—Komandu Polísia  Nasionál  Timor-Leste (PNTL) husu komunidade Kaikoli uma kain 21 neb’e afetadu ba konstrusaun Kuartel Jerál PNTL atu kopera ho PNTL hodi bele realiza konstrusaun.

“Husu Komunidade sira atu koopera tanba Komandu PNTL presija infrastrutura atu atende nesesidade pesoal PNTL nian tanba kuaje Komandu Munisipiu sira iha ona konstrusaun Kuartel foun, maibé  Komandu Jerál  to’o ohin loron sei uza nafatin uma antigu,” Segundu Komandante Jerál  PNTL, Komisariu Faustino da Costa husu liuhosi Jornalista sira iha Kuartel jerál, foin lalais ne’e.

Konstrusaun Kuartel Jerál  foun ne’e prosesu ida ne’ebé naruk desde tinan 2012, iha tinan 2014 PNTL tau osan, maibé  la konsege realiza prosesu ida ne’e, ne’duni iha tinan 2015 osan ne’e fila ba kaixa estadu no iha tinan 2016 PNTL nafatin buka dalan oi-oin atu bele hari ona Kuartel Jerál  PNTL tanba ida ne’e mak nia prosesu hala’o dadaun.

Bazeia ba prosesu, komandu husu komunidade sira ne’ebé afetadu ba futuru konstrusaun Kuatel Jerál  PNTL atu koopera hodi bele realiza konstrusaun tanba Kuartel Jerál  PNTL nu’udar  nesesidade ida ba PNTL tanba too oras ne’e Komandu Jerál  sei utilija nafatin edifisiu ne’ebé maka tuan.

Komisariu ne’e haktuir tan katak, Konselu Ministru aprova katak tinan 2017 presiza halo Kuartel Jeral PNTL no preve ona orsamentu tanba ne’e PNTL nafatin kordena ho ministériu  relevante atu nune’e bele hamutuk ho autoridade lokál para halao enkontru ho komunidade sira neb’e afetadu hodi bele hetan solusaun.

Komunidade uma kain 21 neb’e afetadu to’o ohin loron iha xefe familia 7 maka aprezenta ona dokumentus mai Komandu PNTL no asina ona akordu katak sira atu husik fatin, maibé  familia uma kain 14 maka seidauk aseita tanba ne’e Komandu PNTL liga nafatin ho Ministériu neb’e tutela no Ministériu  kompetente atu hare oinsa prosesu konstinuasaun hodi hari Kuartel Jeral PNTL. (Jornalista : Manuel Pinto/Editor : Alberto Alves)

Foto: Komisariu Polísia Faustino da Costa