Reinu Unidu nia saída hosi UE sei la fahe Europa - Merkel

Xanxeler alemã, Angela Merkel, konsidera iha loron-kuarta ne'e katak Reinu Unidu nia saída hosi Uniaun Europeia sei la fahe Europa no iha konviksaun katak sei laiha kuak ida entre governu sira ho mundu emprezarial.

Merkel, bainhira hakotu reuniaun ida ho nia homólogu italianu, reaje ona ba diskursu ne'ebé Theresa May halo iha loron-tersa, hodi konsidera katak nia iha "impresaun ida loloos" kona-ba prosesu saída britániku sira nian hosi Uniaun Europeia.

"Importante liu maka Europa labele husik atu fahe no ami garanti ne'e ho kontaktu sira ne'ebé maka'as", xanxeler ne'e hatete no hatutan katak governu sira sei hasoru malu ho reprezentante sira hosi emprezáriu sira, tanba ne'e nia hatete katak la senti preokupadu kona-ba divizaun sira.

Primeira-ministra británika, Theresa May, hatete ona iha loron-tersa katak maski hanesan de'it objetivu hosi ‘Brexit’ hodi hamenus imigrasaun hosi ema europeu sira ba Reinu Unidu, nia sei garanti lalais direitu sira hosi sidadaun europeu sira ne'ebé hela iha nasaun.

May, ne'ebé iha nia diskursu ne'ebé halo ba dala uluk kona-ba saída Reinu Unidu nian hosi Uniaun Europeia (UE), afirma ona katak nasaun hakarak kontinua hanesan nasaun tolerante ida no nakloke no dada talentu di'ak sira, maibé fluksu migratóriu sira iha tinan hirak ikus ne'e halo presaun maka'as ba serbisu sira saúde no edukasaun nian.

Nia hatete katak ‘Brexit’ tenki signifika kontrolu ba númeru hosi ema europeu sira ne'ebé to'o iha Reinu Unidu, maibé hatete katak direitu sira hosi ema sira ne'ebé hela ona iha nasaun sei hetan garantia, maibé la hato'o pormenor sira.

Theresa May konfirma ona katak ‘Brexit’ sei implika atu Reinu Unidu husik merkadu europeu úniku, se la'e sei halo parte balun hosi UE no sei laiha posibilidade hodi halo negósiu ba akordu komersial bilateral sira.

Primeira-ministra, ne'ebé troka David Cameron hafoin ‘Brexit’ manán iha referendu loron 23 Juñu 2016, afirma ona katak hakarak "parseria foun ida no ekilibradu" ho UE, hodi nune'e nasaun "sai forte liu, justu liu, unidu liu no nakloke liu ba exterior duké antes".

Iha parte seluk nia observa parseiru europeu sira kontra tentasaun ruma hodi "kastigu" Reinu Unidu, ne'ebé bele konfigura hanesan "asaun aat ida ne'ebé sei prejudika" UE rasik.

Theresa May nia diskursu hanesan hein kleur ona tanba hato'o loloos liña balun negosiasaun sira nian hosi Londres iha prosesu hodi sai hosi UE.

SAPO TL ho Lusa