Governu timoroan iha poupansa hodi husik osan ba ezekutivu tuirmai

Primeiru-ministru timoroan hatete iha loron-segunda ne'e katak Governu iha "kontensaun" balun iha gastu sira hodi husik ba ezekutivu tuirmai, ne'ebé sei harii iha eleisaun sira loron 22 Jullu oinmai, desidi oinsá prosede iha ezekusaun orsamental ba restu tinan nian.

Rui Maria de Araújo hatete ba Lusa katak la senti preokupadu ho informasaun sira hosi ezekusaun orsamental, explika mós katak "iha prosesu oioin ne'ebé halo daudaun" no katak ezekutivu hanoin ba períudu eleitoral ne'ebé besik ona.

"Ha'u la preokupa ho informasaun sira. Iha prosesu oioin ne'ebé halo daudaun no iha kontensaun ruma hosi parte Governu nian hodi la gasta buat hotu ne'ebé programa ona", nia explika ba Lusa.

"Hafoin sei iha Governu foun ida ho retifikativu ida no ne'ebé sei desidi atu aumenta ka fahe fali de'it saida maka iha ona. Ami halo hela esforsu ida hodi gasta de'it saida maka presiza no husik atu Governu tuirmai foti desizaun ikus sira ba orsamentu tinan ne'e nian", nia hatete.

Rui Araújo, ko'alia ba Lusa iha expozisaun ida kona-ba reforma sira ne'ebé halo hosi Governu konstitusional daneen, komenta nune'e faktu hosi ezekusaun orsamental real (pagamentu sira ne'ebé halo efetivamente) hosi konta públiku sira timoroan nian to'o fulan-Maiu nia rohan hosi de'it 31,16% hosi total orsamentadu.

Iha konkretu no hafoin fulan lima governasaun nian, Estadu selu efetivamente total ida hamutuk dolar millaun 432,20, hosi total orsamentadu ba tinan tomak hosi dolar millaun 1.386,8, haktuir hosi informasaun hosi Portal Transparénsia hosi Ministériu Finansa ne'ebé maka konsulta hosi Lusa.

Ezekusaun total, ne'ebé tau hamutuk pagamentu sira ne'ebé halo ona no obrigasaun sira (kontratadu maibé seidauk selu) maka dolar millaun 562,99 ka 40,6% de'it, haktuir hosi informasaun hanesan.

Ba folin ne'e Estadu tau hamutuk mós kompromisu sira hosi dolar millaun 146,2.

Iha kazu hosi reseita sira (ne'ebé la'ós petrolíferu nian) Portal Transparénsia nian konfirma katak hafoin hosi fulan lima dahuluk sira rekolla de'it besik 1/3 hosi reseita sira ne'ebé previstu

.

Iha konkretu maka reseita akumuladu sira hahú hosi inísiu tinan ne'e maka dolar millaun 68,42 ka 33,2% hosi total ne'ebé previstu ne'ebé aumenta ba dolar millaun 146,22.

Timor-Leste iha eleisaun parlamentar sira ne'ebé previstu ba loron 22 Jullu no ezekutivu foun tuirmai, Governu konstitusional dahitu, sei bele simu pose iha fulan-Agostu.

Orsamentu hosi Estadu Timor-Leste nian ba tinan ne'e kalkula folin gastu ida ki'ik liu dezde tinan 2010, ho ezekutivu rekoñese, iha nia preparasaun, katak kapasidade hosi ezekusaun sei afetadu hosi siklu eleitoral ne'ebé inklui prezidensial sira iha loron 20 Marsu.

SAPO TL ho Lusa