Kandidatura hamutuk 23 aprezenta ba eleisaun parlamentar loron 22 Jullu

Partidu polítiku hamutuk 23 no koligasaun ida hosi forsa polítika tolu formaliza ona nia kandidatura ba eleisaun parlamentar sira loron 22 Jullu iha Timor-Leste, haktuir hosi informasaun ne'ebé Tribunal Rekursu iha Díli fó ba Lusa.

Entre partidu kandidatu sira iha partidu haat ho fatin iha parlamentu, liuliu Congresso Nacional de Reconstrução de Timor-Leste (CNRT), Frente Revolucionária do Timor-Leste Independente (Fretilin), Partidu Demokrátiku (PD) no Frente Mudansa (FM).

Refere fali katak votasaun tinan ne'e halo ona ho baze hosi alterasaun foun ba lei eleitoral nian, inklui ba aumentu hosi limiti votu sira nian ne'ebé presiza hodi bele hili deputadu sira, ne'ebé aumenta hosi 3% ba 4% hosi votu válidu sira.

CNRT (36,68%), Fretilin (29,89%) ho PD (10,3%) de'it maka ultrapasa ona limiti hosi 4% ne'e iha eleisaun sira tinan 2012 nian, no FM ho aas oituan hosi 3%.

Iha 2012 aprezenta ona votu hosi kandidatura 19 entre sira maka koligasaun rua.

Lista hosi partidu kandidatu sira ba votasaun loron 22 Jullu nian inklui, entre sira, maka Partidu Libertasaun Popular (PLP) ne'ebé lidera hosi eis-xefe Estadu Taur Matan Ruak, líder polítiku ida ne'ebé ativu liu iha pré-kampaña.

Tinan ne'e iha de'it koligasaun pré-eleitoral ida, Bloku Unidade Popular (BUP) ne'ebé halibur partidu lima ne'ebé antes forma blolu, liuliu Partidu Milenium Demokrátiku (PMD), Partidu Liberta Povu Aileba (PLPA) - hetan 0,85% iha tinan 2012 - no Partidu Demokrátiku Repúblika Timor nian (PDRT).

La halo parte hosi BUP maka Partidu Sosialista Timor nian (PST), partidu daneen ne'ebé maka hetan liu votu iha tinan 2012 ho 2,41% no ne'ebé maka aprezenta mesak ba loron 22 Jullu, no Partidu Repúblika Nasional Timor-Leste (Parentil) ne'ebé maka la kandidata.

Iha lista hosi partidu sira iha mós Partidu Sosial Demokrata (PSD) - ne'ebé harii hosi eis-visi-primeiru-ministru ne'ebé maka foin mate Mário Carrascalão no iha tinan 2012 hetan 2,15% -, Unidade Nacional Democrática da Resistência Timorense (Undertim) - 1,49% - no Partidu Demokrata Kristaun (PDC), partidu ikus ne'e harii hosi eis-prezidente parlamentu nasional nian Vicente Guterres, agora iha bankada CNRT nian, ne'ebé hetan de'it 0,19% hosi votu sira.

Partisipa mós Partido do Povo de Timor (PPT), União Democrática Timorense (UDT) - partidu dahuluk ne'ebé harii iha Timor-Leste no ho 1,13% hosi votu sira iha tinan 2012 - no Partido Republicando (PR), ne'ebé hetan ona 0,91% iha tinan liubá.

Lista inklui mós Partidu Dezenvolvimentu Nasional (PDN) ne'ebé iha tinan 2012 hetan 1,99%, Partidu Haburas Unidade Nasional Timoroan (Khunto) ne'ebé hetan ona 2,93% no ne'ebé apoia ona kandidatura prezidensial hosi António Conceição (PD), ida ne'ebé hetan pozisaun daruak iha votu loron 20 Marsu nian.

Rejista mós ba votu Partido Timorense Democrático (PTD), ne'ebé hetan ona votu 0,54%, Partidu Associação Popular Monarquia Timorense (APMT), Partidu de Desenvolvimento Popular (PDP), Partidu Movimento Libertação Povo Maubere (MLPM) ho Partidu de Unidade Desenvolvimento Democrático (PUDD).

Partidu Centro Ação Social Democrata Timorense (CASDT) ho Partidu Esperança da Pátria (PEP) halo mós parte iha lista ne'e.

Iha total iha partidu neen hosi partidu 31 ne'ebé rejista iha Timor-Leste ne'ebé maka la aprezenta ba eleisaun, liuliu Partidu Nacionalista Timorense de Timor (PNT), Partidu Unidade Nacional (PUN), Partidu Trabalhista Timorense (PTT), Partidu Democrata Liberal (PDL) ho Partidu República Nacional Timor-Leste (Parentil).

Sei klarifika situasaun hosi Associação Social Democrata Timorense (ASDT) ne'ebé, iha prátika, iha rejistu rua ne'ebé ida halo hosi Francisco da Silva nu'udar prezidente no ida seluk hos Joõa Correia nu'udar líder.

Iha kazu ne'e rejistu ne'ebé maka aprezenta ona ba eleisaun parlamentar sira lidera ona hosi Francisco da Silva (prezidente) no Norberto Pinto (sekretáriu-jeral), haktuir hosi informasaun Tribunal Rekursu nian.

To'o loron 11 Juñu, tuir kalendáriu publikadu iha Jornal Repúblika, Tribunal Rekursu kompleta verifikasaun hosi kandidatura sira ne'ebé aprezentadu, ho sorteiu ba orden hosi boletin sira votu nian halo iha loron 15 ka 16 oinmai.

SAPO TL ho Lusa