Governu Aprova Kriasaun Ajénsia Teknolojia Informasaun no Komunikasaun

DILI, (TATOLI) – Governu liuhosi reuniaun Konsellu Ministru (KM) foin lais ne’e aprova diploma husi Gabinete Primeiru-Ministru (PM) kona-ba kriasaun Ajénsia Teknolojia Informasaun no Komunikasaun Timor-Leste (TL).

“Entidade ne’e sei sai nu’udar responsável ba jestaun di’ak kona-ba rede informátika governu nian no entidade públika sira seluk hodi permite moderniza Estadu no prestasaun ida ne’ebé di’ak liu husi servisu”, komunikadu ne’ebé ajensia Tatoli asesu.

Antes ne’e iha loron 7 fevereiru, KM aprova Polítika Nasionál ba Teknolojia Informasaun no Komunikasaun (TIK) ba períodu 2017 to’o 2019 ne’ebé aprezenta husi Koordenadór TIK husi Gabinete Primeiru-Ministru.

Polítika Nasionál TIK iha objetivu atu koordena funsaun iha nivel entidade oin-oin ne’ebé responsabilidade iha setór atividade nian.

“Ho polítika ida ne’e, Governu hakarak atu promove uzu TIK nian liuhusi prestasaun servisu governamentál nian sira (ne’ebé hanaran Governasaun Eletrónika), atu fó motivasaun no diversifika ekonomia doméstika no integra Timor-Leste ho forma ida ne’ebé kompetitivu liután iha ekonomia rejionál no globál”, dehan komunikadu.

Iha previzaun atu kria rejime jurídiku ida ne’ebé koerente no integradu, kompostu husi lei lubun ida hodi garante ambiente ida ne’ebé seguru ba uzu TIK, inklui lei sira kona-ba Cybercrime (siberkriminalidade  – krime ne’ebé relasiona ho internet), tranzasaun eletrónika, protesaun dadus, nomós regulasaun ba  instituisaun sira ne’ebé relasiona ho TIK.

Kriasaun Ajénsia Teknolojia Informasaun no Komunikasaun TL

Haktuir iha rezolusaun governu númeru 9/2017 loron 15 fulan-fevereiru ne’ebé públika iha Jornál Repúblika, Governu estabelese Unidade Koordenadór Governu Elektróniku (CGE – Unidade do Coordenador Governo Eletrónico) iha Gabinete Primeiru-Ministru.

Inisiativa TIK ba governu sei akompaña ho inisiativa iha tempu naruk ho vizaun dezenvolvimentu pessoál.

Unidade CGE hanesan unidade foun ida ne’ebé presiza dezenvolve atu bele kumpri ninia papel iha forma efetiva. Polítika Nasionál TIK propoin atu Unidade CGE bele tranforma sai públika independente, sob tutela husi Primeiru Ministru: “Ajénsia Dezenvolvimentu TIK Timor-Leste”.

Formulasaun polítika ne’e sei halo ba nível ministeriál. Responsabilidade Prinsipál Ajénsia Dezenvolvimentu TIK, sei fiskaliza dezenvolvimentu no implementasaun ne’ebé koordena ho polítika TIK.

Ajensia ne’e sei apóia husi diresaun asoseria ida. Diresaun no administrasaun sei responsável husi akordu ho determinadu Indikadór Prinsipál Dezempeñu (KPIs – Indicadores Principais de Desempenho).

Ajénsia Dezenvolvimentu TIK sei implementa polítika TIK hamutuk ho ministériu sira. Servisu seluk sei halo husi entidade ida ne’e, no seluk sei halo husi ministériu sira, ho monotorizasaun no apóiu husi unidade CGE.

Ajénsia ne’e, iha autoridade atu derije ministériu relevante atu dezenvolve no halo aprovizionamentu funsaun TIK nian, funsaun hanesan entidade koordenadora no apoiu atu harmoniza sistema TIK, interkomunikasaun no fahe informasaun dadus ba parte ministériu.

Unidade CGE, sai responsável másimu ba Ajénsia Dezenvolvimentu TIK, sei estabelese padraun no polítika aprovisionamentu ne’ebé hametin interoperabilidade sistema hanesan ferramentas, iha modu possibilita apóiu efisiente ba nível aprovisionemantu no logístika.

Jornalista: Julia Chatarina | Editora: Rita Almeida