Poltraz Prende Motor Privadu 25 Husi Membru Polisia

DILI - Polisia Tranzitu Munisipiu Dili, prende motor Ofisial Polisia Suku (OPS) rua inklui motor privadu 25 husi membru polisia, tanba komete infrasaun.

Tuir Adjuntu Komandante PNTL Munisipiu Dili Superientendente Assistente Polisia, Euclides Belo katak, motor 25 neebe  Poltraz  prende nee rua husi OPS  restu motor privadu maibe membru polisia nia neebe mak  komete infrasaun.

Ita rekola motor sira neebe komete infrasaun mais ita hatene katak polisia mos envolve iha infrasaun, neebe ita prende mos sira (polisia) neebe komete infrasaun ita prende,” dehan Euclides ba Jornalista sira iha Caicoli, Tersa (11/7/2017).

Tuir Euclides, infrasun neebe membru PNTL balun envolve hanesan sira nia surat motor mate, xapa matrikula balun modifika.

Tanba liga ba tabela kodigu estrada nia, karakter husi xapa matrikula lahanesan ho dokumentu liuliu STNK, ida nee kontra artigu 112 numeru 3, 5 no 8 ho ida nee sira kona multa husi U$12.00 too U$ 60 Dolar Amerikanu.

Adjuntu Komandante nee afirma tan katak, antes atu eduka ema seluk polisia tenke eduka uluk nia aan.

Ita eduka ema seluk tenke eduka ulun ita nia aan rasik tanba nee operasun nee halo ba taranporte publiku no mos ba komunidade internalmente ami halo mos ba ami nia membru sira,” dehan nia.

Tuir Observasaun  STL iha terenu katak, motor 25 nee polisia tranzitu prende tanba membru polisia balu nia laiha xapa matrikula balun uza xepa provizoriu ka plastik inklui mos motor neebe ho marka Ofisial Polisia Suku (OPS) rua neebe ida uza mos xapa matrikula provizoriu maibe hanesna xapa matrikula plastik inklui mos 25 seluk neebe ho kondisaun hanesan.

Nunee Motorista Abelino da Costa dehan, afinal durante ema hotu sente katak komunidade bain-bain deit mak komete infrasaun maibe narealidiade autoridade seguransa mos kontra hela lei hirak nee.

Ita hanoin katak ema komunidade bain- bain deit mak halo krime, halo infrasaun mais afinal ita nia polisia sira mos komete hela,” dehan Abelino.

Tuir loos sira neebe atu hanoin publiku sira rasik tenke komprede diak ona lei sira mak foin ba hanoin ema seluk. Lucia Ximenes

Suara Timor Lorosae