quarta-feira, 12 de julho de 2017

Sosializa programa polítiku ida iha aldeia Karantina

PARTILHAR
Hosi António Sampaio

Kadeira verde plástiku balun, bandeira ida hosi PSD timoroan nian kesi iha au ida, meza azul ki'ik ida ho napperon roza no mutin ida no populasaun na'in 12 hosi aldeia Karatina to'o hodi halo kampaña eleitoral.

Senáriu ne'e hili hosi Partidu Sosial Demokrata (PSD) hanesan elementar tebes hanesan aldeia, konjuntu ida hosi uma sira ho parede no telladu hosi zinku ne'ebé hatudu edifísiu sira ne'ebé maka sai hanesan baze hosi zona nia naran: Karantina tanba iha fatin ne'e, durante okupasaun indonéziu, maka situa armazén Quarentena.

Nune'e, iha netik armazén sira ne'e. Neineik, hafoin Timor-Leste nia independénsia, zona ne'e hetan okupasaun no ohin loron simu númeru hosi família sira ne'ebé seidauk konta loloos, barak liu mai hosi zona sira seluk Timor-Leste nian.

Norberto de Jesus, tinan 22, mai hosi Atsabe, besik Ermera, no ohin loron iha kios ida ne'ebé situa ho di'ak tebes iha prasa. Pedro dos Santos, ne'ebé iha liu tinan ida duké Norberto, estudante, explika katak família sira barak liu hosi Viqueque, sudeste, hosi Suai, hosi súl ka hosi Liquiçá, hosi oeste.


João Gonçalves, prezidente PSD nian - uluk sai ona nu'udar ministru Ekonomia iha Governu konstitusional dahaat, hosi Aliansa Maioria Parlamentar (AMP) - vizita ona bairu, besik iha Díli, hodi "sosializa" programa.

Konversa ho populasaun akontese iha ai matan dukur nia mahon, ai-hun ida ne'ebé "toba nafatin" tanba nia tahan, iha kalan, taka, hodi "deskansa".

Grupu ki'ik hosi populasaun hakbesik hodi rona pozisaun sira hosi PSD. Sira hamriik iha semisírkulu luan hodi ignora oferta hosi líder polítiku sira ne'ebé hatete hodi hakbesik liután, tanba ne'e hanesan "diálogu" ida.

Sira barak kontinua halo atividade. Joven estudante ida iha besik odamatan hakerek iha komputador ida, labarik-feto na'in rua kuru bee hosi posu ida ne'ebé sei iha sigla UNICEF nian maski besik lakon ona. Besik iha tasi, tuur ho sentidu kontráriu iha kadeira plástiku ida, ‘cliente' ida, ho espellu mean ida iha liman, tesi nia fuuk.

Iha fatin sentral hanesan mós iha bairu sira seluk, liuliu sira ne'ebé maka mosu hosi zero iha parte oioin besik iha kapital nian.

Partidu halo ona komísiu hamutuk 11, maibé Gonçalves hatete ba Lusa katak kontinua hanesan importante "loron sira folga nian" hosi enkontru boot sira, ba momentu sira "sosializasaun, fó koñese partidu, saida maka halo ona, saida maka kontribui ona no saida maka hakarak halo iha futuru".

Iha diskursu badak - antes membru ida seluk hosi partidu hanorin oinsá maka vota iha PSD, marka uma ‘18' iha boletin votu nian - João Gonçalves fó hanoin kontributu ne'ebé PSD fó ona ba kestaun oioin, dezde introdusaun ba pensaun ba ema katuas-ferik sira to'o merende eskola nian, hosi mekanizasaun agríkola to'o programa sosial sira.

Nia hatete katak agora partidu dezenvolve ona programa ida hodi "reflete realidade" nasaun nian "no hatán ba nesesidade sira no aspirasaun sira povu nian". Timor-Leste presiza tan "diversifikasaun ekonómiku", hodi investe iha área sira seluk hodi labele depende ba petróleu, nia explika.

Otimista maibé moderadu, Gonçalve senti konfiante katak partidu bele fila fali ba Parlamentu - maibé admiti katak hanesan susar ultrapasa limiti hodi halo: 4% hosi votu válidu sira.

Bainhira iha Karantina votu sira diriji ba polítiku sira ne'ebé vizita sira, karik PSD hetan ona votu balun iha loron-tersa ne'e.

SAPO TL ho Lusa | Foto@ Nuno Veiga/EPA
PARTILHAR

Author: verified_user

Publicação luso-timorense sem fins lucrativos

0 comentários: