Preparasaun Pose IV Lejislatura, Hein Desizaun Final Tribunal

DILI – Oras nee terseira lejislatura Parlamentu Nasional (PN) preparadu ona atu halo tomada de posse ba mandatu foun kuatru lejislatura, maibe sei hein desizaun final husi tribunal hodi halao pose.

Informasaun nee hatoo husi Vice Prezidente Parlamentu Nasional Duarte Nunes hatete, koalia kona ba preparasaun Parlamentu Nasional nian ba tomada de posse ba mandatu kuatru  lejislatura nian nee hanesan bain-bain, neebe hein deit desizaun final husi tribunal.

Kuandu desizaun final mai ona husi tribunal nee signifika ke hotu-hotu preparadu ona, neebe haree ba preparasaun agora dadaun iha ona, i hein deit deputadu foun mai para inisia plenaria, depois formasaun meza, i parlamentu komesa funsiona ho normal fali,” katak Vice PN ba STL Tersa (25/07/2017) iha Parlamentu Nasional.

Nia hatete, haree ba mandatu foun atu mai nee, sira iha buat barak prepara ona, hanesan kona ba lei balu neebe mak iha hela diskusaun, maibe lakonsegue aprova entaun hein deit mandatu foun mai, iha mos deputadu tuan balu nafatin mantein.

Nunee mos Deputadu husi Bankada CNRT Cesar Valente hatete, kona ba deputadu foun sira neebe mak sei mai iha partidu 5, neebe durante iha kampana eleitoral sira halao ona programa barak atu halo, neebe ho komprimisiu neebe mak sira hatete iha kampana nee povu balu grava hela, neebe fiar katak ho komprimisiu nee sira sei kumpri hodi labele ignora fali sidadaun sira nia votus.

Entretantu Deputadu husi Bankada PD Adriano do Nacimento hatete, lakleur tanba deputadu foun sira sei mai hodi troka deputadu tuan, ou terseir lejislautra mandate sei hotu, no sei tama ba mandate foun kuatru lejislatura nian, neebe haree ba partidu neebe mak hetan asentu parlamentar ida nee ba oin sira asumi knaar iha parlamentu, no governu sira sei defende no aprezenta nafatin politika neebe mak sira nian ba hadia povu nia moris. Guilhermina Franco / Jacinta Sequeira

Suara Timor Lorosae