CNE Deteta Diferénsia Numérika Iha Apuramentu Nasionál

DILI, (TATOLI) - Comissão Nacionál das Eleições (CNE) deteta diferénsia numérika iha akta elektrónika no akta orijinál hosi Munisípiu Bobonaro iha ámbitu apuramentu nasionál.

Prezidente CNE, Alcino Barris informa deskripánsia entre akta orijinál no akta elektrónika ba públiku perante apuramentu nasionál iha Salaun CNE, Kaikoli, Kinta (26/7).

“Diferénsia numérika ho akta elektrónika no akta orijinál hosi Munisípiu Bobonaro nian iha Sede Aldeia Laloa, oras ne’e pendente hela kuandu iha ona klarifikasaun hosi Sekretariadu Tekniku Administrasaun Eleitórál (STAE) hafoin CNE bele hatama sistema inklui Munisípiu Aileu,” Prezidente Orgaun Eleitórál Alcino Barris informa.

Hodi esplika liu tan, CNE deteta hosi diferénsia numérika hosi Munisípiu Bobonaro iha deskripánsia entre akta orijinál hakerek rejultadu votu iha sentru votasaun hamutuk 1054 maibé iha akta elektrónika hakerek fali 1045, enkuantu munisípiu Aileu hakerek akta eleitór rejistradu hamutuk 421 maibé eleitór sira ba vota kompostu 445.

Kona-ba Munisípiu Bobonaro nian, CNE informa ona ba STAE atu halo klarifikasaun hafoin hatama ba sistema, maibé hosi Munisípiu Aileu hetan ona justifikasaun katak númeru votu ne’ebé aumenta tanba iha mós lista adisionál.

Apuramentu nasionál iha CNE hahú horseik iha tuku 10:30 kalan ba munisípiu haat hodi haree fila fali bulletin reklamdadu hamutuk 43, nulu hamutuk 18 no validu hamutuk 25. Hosi votu validu atribui ba partidu Fretilin 25, CNRT hamutuk 5, PLP 2, UDT ida, PDC ida no MLPM ida.

Comissão Nacional das Eleições hahú halo apuramentu nasionál iha 25 Jullu ba munisípiu haat mak hanesan Aileu, Baucau, Ainaro no Bobonaro, enkuantu apuramentu sei hotu iha loron 27 hafoin orgaun eleitorál submete ba tribunál rekursu hodi proklama.

Hatan ba diferénsia numérika hosi Munisípiu Bobonaro, Diretór Jerál STAE dehan, orgaun eleitóral rua ne’e servisu hamutuk no CNE iha kompeténsia atu halo verifikasaun ba akta ne’ebé mak STAE submete, kuandu identifika buat ruma entaun sira tenke lori karta ofisiál ruma mai hafoin Prezidente CNE, Alcino Barris koalia ho fiskais no reprejentante Partidu sira iha salao CNE. STAE bele responde.

Jornalista: Zezito Silva | Editór: Manuel Pinto

Foto: Prezidente CNE, Alcino Barris koalia ho fiskais no reprejentante Partidu sira iha salao CNE.