P Belo : Orsida Lokraik MUTL Hasoru PPN

DILI, (TATOLI) - Movimentu Universitáriu Timor-Leste (MUTL), ohin, Kinta, (24/08) lokraik, sei akompaña hosi Polísia Nasionál Timor-Leste (PNTL) hodi hasoru malu ho Prezidente Parlamentu Nasionál (PPN) Aderito Hugo da Costa iha Uma Fukun.

Komandante Polisia Nasionál Timor-Leste (PNTL) Munisípiu Dili, Pedro Belo afirma, seguransa sei akompaña reprezentante Movimentu Universitáriu Timor-Leste (MUTL) atu bele hasoru Prezidente Parlamentu Nasionál (PN), Aderito Hugo da Costa iha loraik tuku 16:00 agora.

“Ha’u ohin ba hasoru Prezidente PN, Aderito Hugo da Costa hodi ko’alia kona-bá reprezentante MUTL ne’ebé sei hasoru ho lider ne’e atu hato’o sira nia preokupasaun” haktuir Komandante PNTL Munisípiu Dili, Pedro Bello.

Objetivu sorumutu ne’e, Pedro hatán, atu labele hamosu tan problema.

Iha sorin seluk, Porta Vóz MUTL, Atanasio Bello hateten Movimentu Universitáriu Timor-Leste  (MUTL) firme nafatin hodi husu ba Parlamentu Nasionál atu halo alienasaun ba rezolusaun kona-ba karreta no karreta sira ne’e tenke entrega fali ba membru deputadu foun sira atu utiliza hodi serve públiku.

“Ami foin simu informasaun hosi Komandante, Pedro Bello katak orsida loraik ami hasoru Prezidente PN, Aderito Hugo da Costa atu hato’o preokupasaun sira ne’e,” dehan Porta Vóz MUTL.

MUTL husu ba Parlamentu Nasionál atu karreta hirak ne’e sei entrega ba iha lojístika PN no kualkér patrimóniu parlamentár tenke rai hotu hanesan motor, kareta, komputadór no seluk tan nu’udar propriedade parlamentu nian.

Enkuantu, Tribunál Distritál Dili (TDD), ohin tun hodi marka distánsia hosi fatin manifestasaun ba PN ho metru 159, ne’ebé akompaña ba markasaun ne’e hosi manifestasaun ne’ebé detein ona iha TDD.

Jornalista: Zezito Silva | Editór: Manuel Pinto

Foto: Komandante Polisia Nasionál Timor-Leste (PNTL) Munisípiu Dili, Pedro Belo