Antes Aranka Ba Oecusse, Alkatiri Hasoru Taur

DILI – Antes Sekertariu Jeral partidu Fretilin Mari Alkatiri, aranka ba Oecusse, Nia (Red.Sekjer Fretilin Mari Alatiri) hasoru malu ho Prezidente PLP Taur Matan Ruak iha ninia Rezidensia, Metiaut, Dili.

Tuir fontes konfirmadu neebe maka lakoi temi nia naran ba jornal nee hateten, Antes ohin dia 23, iha tuku 10: 00 Sekjer Partidu Fretilin Mari Alkatiri, aranka ba Oecusse hodi halao servisu hanesan Prezidente da Autoridade RAEOA-ZEESM TL.

Aman fundador Nasaun nee, iha horseik Tersa mais ou menus tuku 17:00 loraik ba hasoru Prezidente Partidu PLP Taur Matan Ruak, iha ninia rezidensia Metiaut Dili.

“Los duni horseik Sekjer partidu Fretilin Mari Alkatiri, ba hasoru  Prezidente PLP Taur Matan Ruak, iha ninia rezidensia Metiaut, maibe kolia konaba asuntu saida ami ladun hatene , “  dehan fontes nee ba STL, Kuarta (23/08/2017).

Fontes nee mos hateten, Hasoru malu nee akontese entre lideransa nain rua nee deit, lainvolve ho lideransa sira seluk iha estrutura partidu rua nee nia laran.

Portantu tuir presepsaun neebe maka iha publiku katak, dala ruma lideransa nain rua nee hasoru malu, hodi koalia konaba plataforma koligasaun neebe maka iha ona entra partidu rua nee, hodi koalia liu subtansial ba Prezidente Parlamentu Nasional.

Bainhira jornalista konfirma asuntu ida nee ba Vise Prezidente PLP Fidelis Magalhaes, maibe Fidelis lakoi fo ninia komentariu no hateten dehan.

“Ai ita boot sira fo los fontes konfirmadu nia naran mai, depois maka ami ba buka tuir fali, obrigadu ,” dehan Fidelis ho hamnasa, ba jornalista sira.

Entretantu inkontru entre Lideransa rua nee taka ba publiku, maibe to notisias ida nee hatun, seidauk halo konfirmasaun ba Sekjer Partidu Fretilin Mari Alkatiri ho Prezidente PLP Taur Matan Ruak. 

Carme Ximenes/EST2 | Suara Timor Lorosae