Pose Deputadu IV Lejizlatura 5 Setembru

DILI: Hafoin diskusaun lider bankada deside ona hodi foti desizaun tomada de pose ba IV Lejizlatura iha loron 5 Setembro 2017.

Ne’e duni, partidu lima iha Parlamentu Nasional deside hamutuk ona hodi determina loron ba pose deputadu foun sira iha fulan oin.

Antes ne’e, Parlamentu Nasionál (PN) simu karta pedidu husi partidu mais votadu, FRETILIN, hodi adia tomada de pose ba deputadu foun sira tanba sei halo aprosimasaun ho partidu sira ne’ebé hetan asentu iha PN hodi bele hetan konseitu di’ak ba estrutura VII Governu Konstitusionál.

Prezidente Parlamentu Nasionál, Adérito Hugo da Costa hateten, prosesu sira ne’e la’o tarde tanba partidu lima ne’e sei kontinua la’o hodi halo nafatin aprosimasaun akordu. Tanba ne’e, partidu mais votadu husu atu fó tan tempu bele halo kontaktu hodi bele finaliza prosesu ne’e.

Nia dehan, pedidu husi partidu FRETILIN ne’e husu tempu. Ne’e duni, antes atu tama ba iha loron ne’e, Prezidente Parlamentu tenke rona mós bankada sira seluk atu bele hatene data fiksu.

Adérito esplika, pose ba Deputadu IV Lejizlatura tuir deliberasaun lider bankada halo iha loron (21/8), partidu FRETILIN halo karta pedidu mai Parlamentu Nasionál husu atu adia.

Nia esplika, situasaun ida agora ne’e iha pos-eleisaun parlamentár, rezulta situasaun ne'ebé ezije fó tempu ba partidu lima hodi halo negosiasaun hodi fó kontribuisaun IV lejizlatura no funsionamentu parlamentu nasionál no estabilidade governativa.

Adérito hatutan, tuir regra, depois Tribunál Rekursu anunsia rezultadu eleisaun, iha loron 15 nia laran halo kedas tomada pose ba deputadu IV lejizlatura, maibé haree ba loron férias sura hotu tanba ne’e lider bankada halo deliberasaun ba loron tomada pose bele fiksa ona.

Tuir mandatu, nia dehan, lejizlatura ida remata kuandu IV lejizlatura hetan ona pose, maibé ne’e seidauk bele akontese. Tanba ne’e, III Lejizlatura sei eziste nafatin hodi toma desizaun ba deliberasaun ba desizaun tomak atu to’o ba iha tomada pose nian.

Independente