PR mosambikanu aposta iha diálogu ba dame, respeita lei no valor nasional sira

Iha loron-kinta ne'e, xefe Estadu mosambikanu, Filipe Nyusi, defende ona kompromisu hosi nia Governu ho dame iha Mosambike, maibé konsidera katak presiza respeita lei no "valor sira mosambikanidade nian".

"Hanesan Governu, ami mantén nafatin diálogu abertu no lahó prekonseitu sira ho forsa sira hosi sosiedade, ho destake ba ita nia maun-alin hosi Renamo", Filipe Nyusi hatete.

Prezidente mosambikanu ko'alia iha Lichinga, kapital hosi provínsia Niassa, iha norte Mosambike nian, durante aniversáriu ba dala 43 hosi akordu sira Lusaca nian, ne'ebé marka rekoñesimentu ba direitu Mosambike nian ba independénsia.

Tuir Nyusi, objetivu agora maka hetan dame efetivu ida no ne'ebé dura kleur, kondisaun ba dezenvolvimentu sosioekonómiku Mosambike nian.

"Estimadu kombatente sira, ho imi nia esperiénsia, ami hakarak halo Mosambike sai nasaun forte ida, soberanu, prósperu, ida de'it no ne'ebé labele fahe malu", afirma hosi Prezidente mosambikanu.

Maibé, Nyusi fó hanoin katak presiza atu iha konsiderasaun ba lejislasaun no respeitu ba "valor sira mosambikanidade nian" iha ámbitu hosi diálogu, ho referénsia ida ba kondisaun sira ba negosiasaun ho Renamo - ne'ebé nia líder, Afonso Dhlakama, deklara ona suspensaun ida lahó prazu iha fulan-Maiu.

Ba Nyusi, hanesan importante atu nasaun konserva dame hodi respeita asaun sira ne'ebé halo hosi kombatente sira ne'ebé mate ona iha luta ba independénsia.

"Figurinu foun hodi hetan konsensu sosial sira implika valorizasaun hosi ideia útil sira ne'ebé maka mai hosi opiniaun sira ne'ebé la hanesan", esplika hosi xefe Estadu mosambikanu nian.

Filipe Nyusi destaka mós nesesidade hodi valoriza antigu kombatente mosambikanu sira, hosi konsidera katak kestaun ne'e hanesan prioridade ba nia ezekutivu.

"Hanesan konkista ida ne'ebé fó benefísiu ba ema mosambikanu tomak", xefe Estadu hatete no promete fó atensaun maka'as ba antigu kombatente sira nia problema, ho destake espesial ba pensaun sira, ne'ebé reklama beibeik hosi antigu militar sira.

"Ami hakarak, liuhosi kombatente sira, fó korajen ba povu mosambikanu tomak hodi konsentra iha aumentu ba produsaun hanesan ajenda nasional", hatutan hosi Prezidente mosambikanu.

Iha tinan ida liubá, komemorasaun sira ba akordu Lusaca nian halo iha Pemba, kapital provínsial seluk Norte nian, iha tempu ne'ebé sei iha konfrontu militar sira iha Sentru nasaun nian entre forsa sira defeza mosambikanu nian ho grupu armadu Renamo, partidu prinsipal opozisaun nian.

Iha tempu ne'ebá, Nyusi halo kritika ba prezidente Renamo nian hodi akuza nia hamosu dezestabilizasaun iha nasaun.

Tinan ne'e senáriu la hanesan: líder opozisaun nian deklara ona suspensaun ida lahó limiti no kumprimenta ona Nyusi, iha enkontru ida ne'ebé halo iha Agostu no ne'ebé fahe ona imajen sira ne'ebé sira na'in rua hatudu hakarak hodi asina akordu dame nian iha tempu badak.

Komemorasaun sira iha tinan ne'e halo loron 20 antes Kongresu Frelimo nian ba dala 11 ne'ebé maka karik Nyusi sei sai fali kandidatu ba lideransa no liuhosi dalan ne'e tenta sai eleitu ba mandatu daruak Prezidénsia nian iha eleisaun jeral sira tinan 2019 nian.

SAPO TL ho Lusa