Vítima mortal hosi furakaun Irma aumenta ba na'in 10 iha Karaíba

Númeru hosi vítima mortal sira tanba pasajen hosi Irma, furakaun atlántiku ne'ebé forte tebes iha dékada ida nia laran, aumenta ba na'in 10 iha loron-kinta ne'e, hafoin ema na'in ida mate iha illa Anguilla, iha nordeste Karaíba, informa hosi autoridade sira.

Iha teritóriu britániku ho populasaun hamutuk 15.000 ne'e, labele uza 90% hosi estrada sira, haktuir hosi ajénsia ba jestaun emerjénsia Karaíba nian.

Vítima ne'ebé mate iha Anguilla tau hamutuk ho na'in ualu ne'ebé maka rejista iha parte franseza hosi illa St. Martin no iha São Bartolomeu, no na'in ida seluk, labarik ida ho tinan rua, iha Barbuda.

Tuir institutu meteorolójiku Météo France katak Irma hanesan furakaun kleur ho kategoria 5 iha eskala Saffir-Simpson nian ne'ebé maka rejista iha mundu, mantén iha grau ne'e ho anin 298 Km/tuir oras, akontese durante oras 33 nia laran.

Furakaun halakon ona "supertufaun" Haiyan, ne'ebé estraga Filipina iha oras 24 nia laran, iha tinan 2013, ho anin 295 Km/h, halo mós vítima mortal barak, aas liu duké na'in 6.000.

Destruisaun ne'ebé Irma halo iha Anguilla, haktuir hosi fonte governamental britániku, "hanesan todan no, iha fatin balun, hanesan krítiku".

British Virgin Islands sofre mós "estraga todan sira" no iha de'it Montserrat, ne'ebé hanesan mós teritóriu britániku, maka estraga sira "ladún todan hanesan deskonfia antes".

Iha oras ikus ne'e, Irma, tempestade ida "ho dimensaun épiku sira", halo ona "estraga maka'as" iha parte olandeza St. Martin nian (kolónia antigu olandeza nian hosi St. Maarten), estraga aeroportu no halo illa sai izoladu hosi mundu, hatete hosi primeiru-ministru olandés, Mark Rutte, ba imprensa.

"Destruisaun hosi infraestrutura sira, habitasaun sira no negósiu sira hanesan boot tebes", nia hatete.

"Laiha eletrisidade, laiha gazolina, laiha bee, uma sira nakonu ho bee, karreta sira iha bee leten iha estrada no ema sira tuur nakukun, iha uma sira ne'ebé estraga, izoladu hosi mundu".

"Infelismente, agora daudaun labele to'o iha illa tanba estraga maka'as ne'ebé maka akontese iha aeroportu no iha portu", nia hatete no hatutan katak to'o agora laiha informasaun kona-ba vítima mortal sira.

Iha São Martinho (populasaun total 70.000) no São Bartolomeu (10.000),, "senáriu teror nian", "mehi-aat" no "paizajen apokalíptiku" hanesan liafuan sira ne'ebé maka uza hodi hatete estraga sira ne'ebé maka Irma hamosu.

"Ami hasoru hela fenómenu oinseluk ida. Buat hotu ne'ebé maka metin iha mínimu agora laiha ona", hakerek hosi jornalista lokal Steve Prudent, ne'ebé maka haktuir hosi France-Presse.

Tuir prezidente konsellu teritorial, Daniel Gibbs, "95% [hosi illa] sai destruidu".

Iha illa viziñu São Bartolomeu "buat hotu hetan estraga, aat tebes, hanesan senáriu terór ida", hatete hosi Paul Windt, hosi diáriu hosi parte olandeza Daily Herald.

"Destruisaun hanesan maka'as", afirma iha loron-kinta ne'e hosi ministru Interior fransés, Gérard Collomb, hafoin prezidente fransés, Emmanuel Macron, fó sai katak sei halo vizita "bainhira nia bele" ba zona ultramarinu fransés sira ne'ebé maka kona furakaun ne'e.

Irma, iha loron-kinta madrugada, liuhosi tasi-ibun hosi teritóriu norte-amerikanu Porto Rico, desloka ho velosidade ida 26 Km/h ba zona osidental hosi Repúblika Dominikana.

SAPO TL ho Lusa