Involve Bloku Koligasaun, Khunto Sei Lori Ba Zuramentu Ramelau

DILI – Partidu Khunto (Kamanek Haburas Unidade Nasional Timor Oan) neebe involve mos iha bloku koligasaun forma setimu governu, tanba nee sei lori sira nia ema halao juramentu iha foho Ramelau hodi labele uza oportunidade hariku aan no komete korupsaun.

Liafuan nee hatoo husi Deputadu husi Bankada Khunto Jose Agunstinho da Silva hatete, haree korupsaun nee nudar obstakulu ba dezenvolvimentu. Ema hotu lakohi atu halo korupsaun nee buras iha Timor-Leste, partidu Khunto hakarak nee zero toleransia ba korupsaun.

Iha kampana partidu Khunto mos iha nia maneira oinsa atu bele taka dalan ba korupsaun, tanba nee ba ami partidu Khunto bainhira ami nia ema hetan fatin ba iha membru konsellu ministru, ministru, sektretaria estadu ami tenke lori ema nee hodi ba halo juramentu iha foho Ramelau atu nunee bainhira nia asimu kargu labele uza oportunidade hariku nia aan no komete iha korupsaun,” katak Jose ba jornalista iha bankada Khunto PN, Kinta (07/09/2017).

Nia saleinte katak, ba Khunto pozisaun zero toleransia ba korupsaun labele iha membru governu se deit. Espera katak ho lei CAC nee bele aprova atu nunee iha instrumentu legal, hodi regulariza se deit iha  exekutivu ka Lezislativu  ou iha parte neebe deit   karik dalan nakloke atu halo korupsaun presiza iha lei hodi bele regula.

Nunee mos Deputadu husi bankada PD Mariano Asanami Sabino hatete, bankada PD sei tau preoridade ba nesesidade povu, liu-liu mos kona ba lei CAC nian desde inisiu iha sira nia kampana mos luta ba ida nee.

Entretantu Prezidente Parlamentu Nasional Aniceito Guterres hatete, konaba lei anti korupsaun bele dehan atu tau preoridade ba kuatru lejislatura. Maibe nee inisiativa tenke mai husi bankada parlamentares ho deputadus sira laos, meza PN mak tenke hola inisiativa. 

Guilhermina Franco / Jacinta Sequeira | Suara Timor Lorosae