Arsenio Bano: RAEOA-Sei Estabelese Diresaun Juventude, Desportu no Kultura

Ho hanoin atu responde ba nesesidade juventude iha Rejiaun Autonomu Espesial Oe-cusse Ambeno (RAEOA), iha tempu besik persija hasa’e nivel jestaun ba area juventude no desportu hosi nivel departementu ba nivel diresaun. Sekretaria Jeral Rejiaun Autonomu Espesial Oe-cusse Ambeno (RAEOA), Arsenio Bano, hato’o katak Oe-cusse persija hasa’e nivel Departamentu Juventude, Desportu no Kultura ba Diresaun.

Sekretaria Jeral Rejiaun Autonomu Espesial Oe-cusse Ambeno (RAEOA), Arsenio Bano, hato’o katak Oe-cusse persija hasa’e nivel Departamentu Juventude, Desportu no Kultura ba Diresaun, iha tempu besik hodi bele responde ba responsabilidade ne’ebe barak no numeru juventude ne’ebe metade husi total populasaun Oe-cusse.

“Iha Oe-cusse, iha departamentu deit, Departamentu Juventude, Desportu e Kultura, ne’e maka planu ba karik fulan ida ne’e duni, Setembru atu tau ona director diresaun rejional ba Juventude, Desportu, tanba ami hare responsabilidade boot barak, depois, juventude barak, maior parte husi total populasaun iha ne’e juventude idade hanesan 15-24 ne’e barak, sedauk sura tan sira ne’ebe eskola iha liur entaun ita autoridade rejiaun hanoin katak persija upgrade/hasa’e tan nivel ida departamentu ne’e ba diresaun”

Nia hatutan mos katak durante ne’e koordenasaun entre SEJD no mos Rejiaun kona ba asuntu Juventude la’o estavel, no Rejiaun sei tau osan ba Diresaun refere hodi hala’o atividade no sei servisu hamutuk ho Sentru Juventude iha Oe-cusse, para halo maksimiza esforsu servisu ba juventude. Tenik autoridade ne’e.

Mensajen ne’e hato’o husi Sekretaria Jeral Rejiaun Autonomu Espesial Oe-cusse Ambeno (RAEOA), Arsenio Bano, iha nia diskursu wanihira hala’o abertura ba atividade formasaun ba Jestor Sentru sira kona ba Jesatun Organizasaun, iha Oe-cusse, 4 de Setembru 2017.

Iha sorin seluk tuir Vitor Manuel Neno, Xefi Departamentu Juventude, Desportu e Kultura, katak importante atu hasa’e Departamentu ba Diresaun.

“Atu hasa’e tan nivel ba diresaun ida, ne’e opsaun di’ak para separa juventude, desportu husi edukasaun, tanba durante tinan rua, departamentu juventude, desportu submete ba edukasaun. Edukasaun nia programa mos barak, juventude no desportu nia programa mos barak. Kuandu ami planu orsamentu e ami nia orsamentu boot edukasaun mos boot, entaun ami nian labele aprova, tanba orsamentu boot liu standar ne’ebe mak iha. Entaun programa boot ho boot mak hamutuk halo konfuzaun. Juventude desportu persija sai diresaun ida, para nia loke tan liras ba programa sira joven nian.”

Juventude Oe-cusse, Imaculada da Costa Lelan, hatoo nia sentimentu ba jornalista TAFARA.TL “Hau nuudar juventude hau apresia teb-tebes e hau espera katak liu husi oportunide ne’e joventude sira bele espresa tan sira nia kapasidade nia konesimentu atu nune’e bele dezenvolve ba oin tan iha Oe-cusse”.

Jornalista TAFARA.TL mos konsege dadalia ho Diretor Nasional Juventude, David Tomas De Deus, kona ba hanoin Sekretariu Jeral RAEOA ne’e no nia aseita teb-tebes ho hanoin mak iha hodi eleva tan nivel Departamentu Juventude ba iha Diresaun hodi bele dezenvolve di’ak liu tan iha area juventude, no hatudu ba ema hotu nia komitmentu iha area ne’e.

“Em prinsipiu sira agora la’o hela ne’e, tantu Sentru Juventude ne’e iha RAEOA, mais SEJD sei kontinua fo apoiu ba sira, tanba sira hala’o servisu ba ita nia joven sira. Tanba ne’e mak aseita tebes ho ohin, Sekretaria Jeral hatete ne’e, sira mos kontinua apoiu e SEJD mos sei kontinua apoiu ba sira. Ida ne’e hatudu mos katak hotu-hotu iha komitmentu ba dezenvolvimentu juventude liliu iha rai Oe-Cusse ne’e,” akresenta Diretor Nasional Juventude SEJD ne’e.

Yane Maia | TAFARA.TL | Editor: Ato Lekinawa Costa

Lee mos iha TAFARA.TL