Diferensia Votus, Persepsaun Koligasaun Ladiak Ba Publiku

DILI - Tuir sosiedade sivil Fundasaun Mahein (FM) nia hare konaba diferensia votus ba meza parlamentar nee sei laiha implikasaun ba governasaun foun mai. Ida nee signifika katak persepsaun koligasaun ladiak ba publiku.

Liafuan hirak nee hato husi Adjuntu Diretor Ezekutivu Fundasaun Mahein (FM) Joao Almeida ba STL iha nia knar fatin Fomentu, Komoro, Dili Kinta (7/9/2017). Tuir nia, votus nebe akontese iha elisaun meza PPN hanesan dinamika politika deit. Tanba tuir lei deputadus iha direitu atu hili figura neebe sira fo fiar atu bele kaer pasta prezidente PN.

Rezultadu elisaun tempu neba koligasaun nia votus tuir lolos nee 35 maibe nakfilak ba 33 no partidu opozisaun CNRT no PLP tuir lolos votus 30 maibe nakfilak ba 32. Agora intensaun husi koligasaun nee atu kria maioria parlamentar. Tanba nee maka konsidera votasaun ba PPN nee buat seluk ida no formasaun governu buat seluk mos.

Persepsaun koligasaun hatudu sinal ladiak ba publiku konaba koligasaun partidu Fretilin, Partidu Demokratiku no Khunto. Nunee mos iha esperansa nafatin katak partidu rua CNRT no PLP neebe lahola parte iha koligasaun nee hakarak nafatin prinsipiu ida konstrutivu no lakohi elisaun antisipada. Ida nee hatudu katak koligasaun governasaun foun mai dura ba tinan lima.

“Hau fiar mos katak partidu rua seluk neebe lahola parte iha koligasaun sira iha prinsipiu ida nebe diak. Katak hakarak sai opozisaun ida nebe konstrutivu no edukativu no lakohi elisaun antisipada. Signifika katak estabilidade governu mai nebe lidera husi Fretilin ho nia koligasaun sira iha tinan lima mai,”nia dehan.

Diretor Ezekutivu HAK Manuel Monteiro Fernandes dehan ate agora seidauk hatene nota intendementu koligasaun Fretilin, PD no Khunto. Maibe keta iha nota intendementu nee hamosu buat seluk, ida nee konsidera violasaun. Ida nee signifika katak partidu koligasaun sira nia vizaun politika, programa no situasaun lahanesan.

Agora prinsipiu husi koligasaun nee maka lahanesan partidu ida hakarak dada ba Loromonu, partidu ida seluk hakarak dada ba Lorosae no seluk hakarak dada ba tasi feto no seluk husu ba tasi mane. Agora nee hanesan boraixa nebe atu dada naruk entaun tenki kotu. Kuandu hakotu ona atu tutan fali iha uma  fukun entaun susar ona.

Tanba povu nebe fo fiar ba partidu politika liu husi elisaun lamanan maioria absoluta. Tamba durante tinan 15 nia laran povu sente no hare no katak laiha mudansa ba sira nia vida moris. Maibe parte partidu koligasaun sira tenki esplika klaru ba nia membrus deputadus hotu atu hetene didiak kontiudu husi nota intendementu koligasaun nee atu labele iha impaktu negative.

“Tanbasa povu matenek hare ona tinan 15 nia moris laiha mudansa. Ita dehan katak prinsipiu direitu no demokratiku maibe praktika hatudu politiku maka komandu fali lei. Povu lakohi tamba nee atu hametin formasaun governu nee maka lider parpol tenki brifing sira nia membrus nebe atu asume knar hanesan deputadus,” nia kualia.

Retor Institute Of Businiss (IOB) Augusto da Conceicao Soares, SE.MM dehan kualidade koligasaun konsidera ladun forte. Agora dalan seluk ba sira partidu Fretilin, PD no Khunto maka presiza tur hamutuk no kualia didiak atu nunee labele mosu nia implikasaun ba governasaun. Parte seluk mos bele implika mos ba orsamentu jeral do estadu. Tamba situasaun nee bele fo tempu ba opozisaun sai forte liu tan.

“Tuir hau nia hare koligasaun sira ida hatudu koligasaun sedauk forte diak. Hau hanoin tenki tur hamutuk kualia didiak atu oinsa bele hetan poder ekivalen atu laiha implikasaun ba governasaun. Nunee mos ba debate orsamentu jeral do estadu,”nia tenik tuir. 

Justinho Manuel | Suara Timor Lorosae