Ezekutivu timoroan analiza Programa Governu nian

Programa hosi Governu konstitusional timoroan dahitu nian, ne'ebé karik sei aprova iha loron-sesta, iha prioridade sira iha área sosial, dezenvolvimentu ba infraestrutura sira, área ekonómiku no governasaun di'ak no reforma institusional, informa hosi ezekutivu.

Planu ida hosi dokumentu, ne'ebé akompaña ho Matadalan ida Implementasaun nian, analiza ona iha loron-kuarta ne'e durante reuniaun semanal hosi Konsellu Ministru sira nian karik sei hakotu no aprova iha reuniaun estraordináriu ida iha loron-sesta antes haruka ba parlamentu.

Iha komunikadu, ezekutivu esplika katak Programa Governu nain, ne'ebé maka prepara hela dezde governante dahuluk sira ne'ebé simu pose iha loron 15 Setembru, "kumpri Planu Estratéjiku Dezenvolvimentu (PED) tinan 2011-2030 nian no ba Objetivu sira Dezenvolvimentu Sustentável nian iha tinan lima oinmai".

Durante reuniaun loron-kuarta nian, ministru iha Prezidénsia hosi Konsellu Ministru sira nian, Adriano do Nascimento, ne'ebé kordena ona ekipa téknika iha elaborasaun projetu nian, halo ona aprezentasaun hosi serbisu sira ne'ebé dezenvolvidu no konteúdu dokumentu nian.

Komunikadu refere katak Governu nai objetivu sira iha área sosial maka "asesu ba ensinu ho kualidade, serbisu sira saúde ho kualidade ba ema tomak, apoiu ba ema fraku sira, dezenvolvimentu sustentável ba jerasaun tomak, indústria kriativu forte, no joven sira ne'ebé saudável, edukadu no ho valor étiku sira".

Aumenta kapasidade produtivu no PIB potensial, hadi'a asesu ba ema sira ba serbisu sira no sustentabilidade hanesan liña jeral sira hosi objetivu sira ba parte dezenvolvimentu infraestrutura nian.

Iha nível ekonómiku, Governu hakarak "aumenta produsaun agríkola, dezenvolve indústria hosi rekursu natural sira, aumenta rendimentu liuhosi kriasaun ba empregu, no ambiente favorável ba diversifikasaun ekonómiku".

Iha ajenda hosi governasaun di'ak no reforma institusional, dokumentu matadalan hosi Governu aposta iha "garantia defeza nian, seguransa no estabilidade nasional, sistema justisa ida ne'ebé asesivel no efetivu, integrasaun no pozisionamentu global Timor-Leste nian, reforsu ba kultura demokrátiku liuhosi responsabilizasaun no transparénsia no jestaun hosi área públiku efetivu, efisiente no responsável".

Hamutuk ho dokumentu ne'e, ekipa ida hosi Unidade Planeamentu, Monitorizasaun ho Avaliasaun hosi gabinete primeiru-ministru nian prepara ona Matadalan ba Implementasaun nian ne'ebé haree mós ba objetivu sira hosi PED ne'ebé hetan ona no defini saida maka sei halo no oinsá maka bele hetan objetivu sira seluk.

Hafoin aprovasaun hosi Programa Governu nian, ezekutivu sei lori ba Parlamentu Nasional orsamentu retifikativu ida ba tinan 2017 ne'ebé, tuir primeiru-ministru, Mari Alkatiri, hatete ba Lusa katak sei laiha impaktu iha folin total hosi gastu sira ne'ebé kalkula ona ba tinan ne'e.

Ezekutivu sei prepara mós Orsamentu Jeral ba Estadu ba tinan 2018.

Durante reuniaun loron-kuarta ne'e, Konsellu Ministru sira rona mós espozisaun hosi Agio Pereira, ministru-adjuntu hosi primeiru-ministru ba Delimitasaun Fronteira sira nian, kona-ba negosiasaun sira hosi Komisaun Konsiliasaun nian ba definisaun fronteira tasi nian entre nasaun ne'e ho Austrália, ho ronda foun ne'ebé previstu hahú iha loron 09 Outubru, iha Haia.

Konsellu Ministru sira aprova mós nomeasaun hosi sekretáriu rejional adjuntu sira hosi Autoridade Rejiaun Administrativu Espesial Oe-Cusse Ambeno nian.

Arsénio Bano maka nomeadu ba sekretáriu rejional adjuntu ba Apoiu ba Kordenasaun hosi Área Sosial no Administrasaun no Leónia Costa Monteiro nomeadu ba sekretária rejional adjuntu ba Apoiu ba Área Finansa no Dezenvolvimentu Ekonómiku.

SAPO TL ho Lusa