PM: Governu timoroan sei kompletu iha semana oinmai

Primeiru-ministru timoroan, Mari Alkatiri, hatete ona katak Governu konstitusional timoroan dahitu sei kompletu iha semana oinmai ho tomada pose ba elementu sira ne'ebé falta, entre sira maka ministru Justisa ho Turizmu.

"Ha'u hakarak hili feto sira ba kargu Justisa ho Turizmu. Sei hanesan faze ikus nomeasaun nian", Mari Alkatiri hatete no esplika katak hein atu membru sira seluk hosi ezekutivu bele simu pose iha semana oinmai.

Fonte hosi Governu esplika ona ba Lusa katak aleinde kargu sira ministru sira Justia ho Turizmu nian sei nomeia mós visi-ministru ida ba turizmu, visi-ministru ida Finansa no sekretáriu Estadu ida, karik ba Eletrisidade.

"Buat hotu indika katak ne'e maka sei hanesan kompozisaun definitivu hosi ezekutivu", nia hatete.

To'o ohin loron simu ona pose, iha faze rua, membru Governu na'in 32 - entre sira maka primeiru-ministru Mari Alkatiri - falta simu pose visi-ministra Negósiu Estranjeiru, Adaljiza Magno, atual embaixadora iha Singapura.

Ho tomada pose hosi membru sira Governu nian konklui ona prosesu naruk ida ba negosiasaun no formasaun hosi Governu konstitusional dahitu ne'ebé maka ho baze formal iha koligasaun minoritáriu hosi Frente Revolucionária do Timor-Leste Independente (Fretilin) ho Partidu Demokrátiku (PD) maibé inklui ema sira ne'ebé iha ligasaun ba partidu sira seluk inklui ema sira ne'ebé iha ligasaun ba partidu sira seluk inklui forsa sira opozisaun nian hosi Congresso Nacional da Reconstrução Timorense (CNRT) ho Partidu Libertasaun Popular (PLP).

"Ha'u kumpri ona ho buat ne'ebé ha'u promete, ho buat ne'ebé Fretilin promete, tenta inklui maka'as sidadaun sira ne'ebé reprezentadu ka la'ós nia respetivu partidu sira. Inklui maka ne'e duni. Fretilin disponibiliza ona nia líder sira hodi halo parte iha Governu daneen maibé nunka konsidera sira hanesan reprezentante hosi Fretilin. Ne'e maka naran inkluzaun, hanesan insidénsia parlamentar", Alkatiri esplika hafoin tomada pose hosi membru foun sira Governu nian iha loron-tersa.

Xanana Gusmão la halo parte iha Governu, ne'ebé sei asumi lideransa hosi Alta Autoridade foun ida ba Dezenvolvimentu Kosta Súl, ne'ebé iha tinan hirak tuirmai - no tanba sekuénsia hosi akordu fronteira sira entre Timor-Leste ho Austrália - tenki reflete parte importante ida hosi investimentu ezekutivu nian.

Xanana Gusmão la presiza halo parte iha Governu hodi serve Estadu", Alkatiri konsidera.

Teste boot dahuluk ba ezekutivu sei akontese iha tempu badak bainhira Governu lori Programa Governu nian ba Parlamentu Nasional ne'ebé Alkatiri garanti katak prontu ona no hanesan motivu prinsipal hosi revizaun ikus nian.

Imprensa timoroan balun, rede sosial sira no debate polítiku balun kontinua kestiona posibilidade hosi Governu minoritáriu la konsege kumpri nia mandatu, maibé José Ramos-Horta, ministru Estadu nian, konsidera hanesan ladún provável.

"Demokrasia, sosiedade livre ida, rede sosial sira fó ba buat sira ne'e. Hodi hatete buat furak sira, ladún furak, hodi haree konstitusionalista sériu sira no hodi haree konstitusionalista balun sira. Buat hotu vale", nia hatete.

"Mari Alkatiri ho membru sira seluk Governu nian hanesan kalma. Ha'u senti impresionadu ho esforsu maka'as ne'ebé maka Mari Alkatiri halo hodi kumpri saida maka nia hatete antes eleisaun", nia konsidera.

Horta senti konviksaun katak CNRT sei ajuda Governu iha Parlamentu Nasional tanba nia líder, Xanana Gusmão, "hatete ona katak hakarak ajuda Governu no autoriza ona Agio Pereira hodi aseita kargu ida iha Governu ba área krítiku ida, fronteira" nasaun nian.

"Mane Estadu nian ne'ebé hanesan fundador nasaun ne'e nian lakohi tan surpreza no hakarak estabilidade. Ema ida hanesan Xanana la aprova de'it Programa Governu nian bainhira laiha lójiku ho Planu Estratéjiku ba Dezenvolvimentu no ho vizaun no mehi hodi dezenvolve kosta súl", nia hatete.

"Ha'u fiar katak Xanana Gusmão sei lidera Alta Autoridade foun. Hanesan autoridade ida ne'ebé hakarak iha dalan barak hodi rezolve, hosi Estadu, maibé mós sei mobiliza dalan esterior barak. Ha'u mós sei apoia hodi mobiliza finansiamentu internasional ba kosta súl", nia afirma.

SAPO TL ho Lusa