KFP Disemina Rezultadu Sondajen ba MSS

DILI, (TATOLI) – Komisaun Funsaun Públika (KFP), disemina rezultadu sondajen persepasaun públiku kona-ba funsaun públika Timor-Leste (TL) ba funsionáriu Ministériu Solidariedade Sosiál (MSS) iha salaun MSS, Kaikoli Dili, kinta (5/10).

Komisáriu KFP, José Teles Cristovão informa rezultadu diagnóstika halo bazea ba sondajen ida hodi hateten katak rekursu umanu kada instituisaun, oras ne’e iha ne’ebé no atu ba iha ne’ebé.

“Iha rezultadu ne’e haree ba onze área ne’ebé mak define ona iha kestionáriu ne’ebé halo ho instituisaun ida-idak”, informa komisáriu José Teles ba mídia sira iha salaun MSS, ohin.

Bainhira ajénsia Tatoli husu kona-ba rezultadu diagnóstika nia utilizasaun ba futuru, nia hatan katak iha segmentu lubuk ida mak KFP sei haree bazea ba rezultadu sondajen.

“Ida, Haree ona polítika ida, halo policy maker kona-ba oinsa segmentu diagnóstika ne’e atu la’o ba oin. Parte ida mak halo diseminasaun ba kada instituisaun atu sira bele hatene kona-ba oinsá sira-nia frakeza. Frakeza sira ne’e, sira sei tuur hamutuk iha instituisaun oinsá atu hadi’a”, haktuir komisáriu ne’e.

Ministra Solidariedade Sosiál, Florentina Smith informa ho diseminasaun husi KFP ba funsionáriu sira, atu tetu to’o iha ne’ebé ona sira-nia serbisu no dezempeñu durante ne’e hodi nune’e bele serbisu ho di’ak no ho responsabilidade, hadi’a buat balun ne’ebé presiza liliu iha atendimentu públiku.

“Ita la’o hamutuk, serbisu hamutuk hodi hadi’a ita-nia rain, ita-nia administrasaun públika tuir kna’ar ne’ebé mak ita iha, tuir regra ne’ebé mak ita iha atu serbi ita-nia estadu, ita-nia povu”, akresenta ministra Florentina Smith.

Nia reforsa, MSS presiza duni rezultadu sondajen ne’e hodi hatene sira-nia falta hodi bele reforsa no mellora sira-nia serbisu.

“Iha ministériu ami hein katak buat balun presiza duni, ami-nia falta iha ne’ebé? Presiza iha ne’ebé atu reforsa, mellora. Ministériu ne’e ministériu ne’ebé atendimentu sosiál, hein sujestaun, observasaun ne’ebé mak di’ak atu kontribui, atu nune’e ami bele hadi’ak di’ak liutan ami-nia serbisu loro-loron nian tuir ami-nia vizaun no misaun”, governante ne’e espera.

Entretantu, iha abertura diseminasaun, Prezidente KFP, Faustino Cardoso hateten sondajen ne’e hala’o liuhusi prosesu ne’ebé partisipativu.

Sondajen ida ne’e hala’o tanba orientasaun husi primeiru-ministru sestu governu konstitusionál, Rui Maria de Araújo hodi haree no hatene kona-ba prestasaun funsaun públika ba iha públiku tuir área ida-idak nian inklui koñesimentu no esperiénsia públika ninian kona-ba tipu prestasaun ne’ebé mak iha.

Husi parte feto nia haree oinsá, husi parte mane nian, haree oinsa. Haree mós tuir rejiaun oinsá, leste, sentrál ho oeste no Rejiaun Autonoma Administrativa Ekonómika, Ambeno-Oe-Cusse (RAAEOA) sira-nia persepsaun.

“Iha sondajen ne’e, ami halo análize ba faktu, programa sira ne’ebé mak implementadu. Katak hatene gap (lakuna-red) nia relevánsia ho realidade ne’e to’o iha ne’ebé”, informa prezidente KFP, Faustino Cardoso.

Peskiza ne’e hala’o husi KFP, parseria ho organizaun lokál ho naran INSIGHT ne’ebé iha esperiénsia kle’ur no koñesimentu kle’an ba sondajen sientífiku ho fundu rihun $79,5 ho fundu Ministériu Finansa husi Fundu Dotasaun Governu.

Peskiza ne’e hala’o iha munisípiu 13 iha teritóriu Timor-Leste ho totál amostra ema na’in 1.200.

Atividade hanesan, aban, sesta (6/10) sei kontinua hala’o iha salaun INFORDEPE, Ministériu Edukasaun (ME), Balide Dili, ba funsionáriu ME sira.

Jornalista: Rafy Belo | Editora: Rita Almeida

Foto: Aprezentasaun rezultadu sondajen husi tékniku sira, antes ne’e. Foto: KFP