Tenke Konsidera Loron Mundial Kafe

DILI – Kafe Timor naran morin iha Mundu Internasional, tanba nee husu ba governu TL hamutuk ho povu agrikultores iha rai laran atu konsidera loron mundial kafe nian neebe mak monu iha loron 1 fulan Outubru.

Tuir Reprezentante povu iha uma fukun Parlamentu Nasional, Deputadu Mericio Akara, Kafe Timor naran morin iha Mundu Internasional, tan nee husu ba governu TL, ho povu agrikultores iha rai laran atu konsideira loron mundial ba kafe, neebe monu iha loron 1 fulan Outubru maibe haree ba realidade, TL nunka atu tau loron nee importansia hodi halo komemorasaun.

“Ami ezize atu selebra loron nee, hanesan parte ida atu fo hanoin ba povu agrikultor sira, oinsa atu hasae produsaun kafe iha rai laran, no oinsa ita bele halo promosaun ida neebe diak iha mundu kona ba kualidade kafe Timor,” informa Mericio liu husi Sesaun Plenaria Segunda (02/10/2017) iha PN.

Nia mos afirma tan katak TL presiza komemora loron nee, tanba TL mos durante nee halo ona exportasaun ba rai liur, maske exportasaun nee ho kuantidade neebe kiik, maibe TL hahu promove ona kafe iha Mundu kona ba kualidade no produsaun kafe nee tama ona iha stark bak tan nee, ba oin tenke konsideira loron mundial ida nee.

Iha fatin hanesan Deputadu Domingos de Carvalho mos hatutan, loron importante sira hanesan nee, governu tenke konsideira tanba, kafe Timor mos hanesan produtu organiku ida neebe TL halo exportasaun ba rai liur.

“Hau hanoin ita tenke konsidera loron sira hanesan nee, karik ita toma konsiderasaun maka ida nee, hanesan parte ida atu eduka diak liu tan ita nia agrikultor sira iha baze, oinsa atu servisu makaas liu tan hodi hasae produsaun kafe iha rai laran,”informa nia.

Nunee mos  Mateus de Araujo (setor privadu) hatutan, intensaun atu selebra loron mundial kafe nee, hanesan parte ida atu eduka didiak povu agrikultor sira maske ita nia exportasaun sei kiik maibe ita bele sura ona katak kontribui resetas ba estadu, tan nee governu tenke trata asuntu nee halo diak atu nunee, TL mos bele tama iha faze promosaun. 

Madalena Horta | Suara Timor Lorosae