PR timoroan asina dekretu foun ba nomeasaun membru sira Governu nian, inklui feto na'in rua

Iha loron-segunda ne'e Prezidente timoroan asina ona dekretu foun ida ba nomeasaun hosi membru sira Governu nian ne'ebé sei simu pose iha loron-tersa, halo parte feto na'in rua hodi aumenta nune'e lista ne'ebé fó sai ona.

Dekretu foun, ne'ebé publika ona iha Jornal Repúblika, anula dokumentu ne'ebé publika ona iha loron-sesta liubá, ne'ebé aprezenta sala balun, inklui iha títulu hosi ministru ida nian, no adisiona elementu na'in rua foun ba elenku governativu.

Hamutuk maka nomeasaun ba membru foun na'in 21 hosi ezekutivu ne'ebé hafoin serimónia simu pose, marka ba loron-tersa ho prezensa hosi xefe Estadu, Francisco Guterres Lu-Olo, iha Prezidénsia Repúblika, sei hamutuk ho elementu na'in 12 ne'ebé simu ona pose hosi Governu ne'ebé lidera hosi Mari Alkatiri.

Dekretu konfirma títulu loloos hosi Agio Pereira nian, militante hosi Congresso Nacional da Reconstrução Timorense (CNRT, iha opozisaun) no ne'ebé sei okupa kargu nu'udar ministru-adjuntu hosi primeiru-ministru ba Delimitasaun hosi Fronteira sira.

Novidade hosi lista nomeadu sira nian maka inkluzaun hosi Adaljiza Magno hanesan visi-ministru Negósiu Estranjeiru no Koperasaun nian no Laura Lopes nu'udar sekretária Estadu ba Igualdade Jéneru no Inkluzaun Sosial nian.

Inkluzaun hosi elementu na'in rua ne'e aumenta nune'e ba númeru haat hosi feto sira iha Ezekutivu no ne'ebé akontese hafoin loron barak hetan krítika iha rede sosial sira kona-ba númeru ki'ik hosi feto sira iha elenku governativu nian.

Lista hosi membru foun sira Governu nian inklui Mariano Sabino, líder hosi Partidu Demokrátiku (PD), parseiru hosi Frente Revolucionária do Timor-Leste Independente (Fretilin) nian iha koligasaun Governu nian ne'ebé asumi pasta ministru Estadu nian no ministru hosi Rekursu Mineral sira nian.

José Reis, sekretáriu-jeral adjuntu Frente Revolucionária do Timor-Leste Independente (Fretilin) nian, sei asumi knaar nu'uar ministru-adjuntu hosi primeiru-ministru ba Asuntu sira Governasaun nian.

Fernando Hanjam, dosente hosi Universidade Timor-Leste ho doutoramentu hasai iha Aveiro, maka ministru Edukasaun foun no Hernâni Coelho, ne'ebé iha anterior Governu kaer pasta ministru Negósiu Estranjeiru nian, agora asumi knaar nu'udar ministru Petróleu nian.

Lista inklui visi-ministru foun sira seluk, liuliu Mariano Renato Monteiro da Cruz ba Dezenvolvimentu ba Obra Públika nian, Abrão Oliveira ba Dezenvolvimentu ba Habitasaun, Ordenamentu ho Ambiente, no Inácio Moreira ne'ebé mantén iha Dezenvolvimentu ba Transporte sira no Komunikasaun nian.

José Anuno sei sai nu'udar visi-ministru Administrasaun Estatal nian, José Neves (kandidatu prezidensial iha eleisaun ikus no iha ligasaun ba Partidu Libertasaun Popular, PLP) sei sai nu'udar visi-ministru Edukasaun no Kultura ho Luís Lobato sei sai nu'udar visi-ministru Saúde nian.

Maski seidauk hatene sé maka kaer pasta ministru Justisa nian, dekretu hatudu "númeru daruak" Sebastião Dias Ximenes, no Jacinto Gusmão asumi kargu ba visi-ministru Komérsiu ho Indústria nian, no Deolindo Silva kaer pasta visi-ministru Agrikultura ho Peska nian.

Sei simu mós pose iha loron-tersa sekretáriu sira Estadu nian, espesialmente Cipriano Ferreira iha Agrikultura no Peska, Matias Boavida iha Konsellu Ministru sira no Komunikasaun Sosial nian, no Osório Florindo da Conceição Costa iha Desporto no iha Promosaun hosi Alta Kompetisaun.

Sekretáriu Estadu foun ba Juventude no Traballu nian maka Nivio Magalhães no sekretáriu Estadu hosi Veteranu sira maka André da Costa, ne'ebé koñesidu ho naran L4, ne'ebé hanesan mós militante PLP nian.

SAPO TL ho Lusa