PN Lamenta Labarik Monoria Asesu Joga-Fuma-Hemu

DILI - Deputadu iha uma fukun Parlamentu Nasional (PN), lamenta labarik idade minoria asesu ba joga makina, fuma, no hemu tua, ida nee bele hamate futuru labarik sira nian.

Lamentasaun nee hatoo husi Deputadu  Bankada PLP, Abel Pires liu husi sesaun plenaria katak, labarik kiik oan agora nee livre los asesu ba joga makina iha Dili laran, hemu tua, inklui fuma sigaru, tanba nee ministeriu relevante tenke kontrola atu nunee minimiza  labarik sira husu hahalok sira nee.

Hau hanoin asesau ba fuma, hemu no halimar joga makina nee ba ema boot sira iha liberdade atu asesu, maibe labarik kiik labele, tanba nee bele estraga sira nia futuru,” katak Deputadu PLP nee iha sesaun plenaria Segunda (02/10/2017) iha PN.

Deputadu nee husu ministeriu relevante atu kria kondisaun hodi regulariza hahalok sira nee, liu-liu ba loke fatin ba labarik sira asesu ba joga makina neeba iha ona Timor. Nunee mos haree ba  labarik ho idade minoria sira mak ba sosa tua, sosa sigaru hodi fuma no hemu, ida nee mak laprevene labarik sira barak mak estraga sira nia futuru,  tanba nee presiza iha regulamentu ida oinsa kontrola labarik sira hodi hadook aan husi hemu, fuma no joga.

Entretantu hatan ba kestaun nee Prezidente PN Aniceto Guterres iha plenaria hatete, ho informasaun no preokupasaun sira neebe distintus deputadu no deputada sira hatoo ona, iha plenaria, meza sei hatoo ba iha governu. 

Guilhermina Franco | Suara Timor Lorosae