Prezidente
hosi partidu daruak timoroan nian, Xanana Gusmão, anunsia iha loron-tersa ne'e
akordu ida ho líder sira hosi partidu sira seluk hosi forsa opozisaun nian ba
Aliansa ida hosi Maioria Parlamentar (AMP) ne'ebé maka "preparadu hodi
serbi nasaun".
"Hafoin
diálogu ho dirijente sira hosi PLP ho KHUNTO kona-ba situasaun polítika ami
senti obrigasaun boot ida hodi hatán ba interese nasaun nian. Ohin ami halo
akordu polítiku ida entre partidu tolu", Xanana Gusmão hatete iha mensajen
ida ne'ebé fó sai iha pájina hosi nia partidu, Congresso Nacional da
Reconstrução Timorense (CNRT), iha Facebook.
"Ami
diriji ho respeitu tomak ba Prezidente Repúblika, felisita instituisaun tomak
Estadu nian, ami afirma katak partidu tolu unidu iha Aliansa hosi Maioria
Parlamentar (AMP) ami prontu hodi hatán ba situasuan susar nasaun nian",
nia hatete iha mensajen.
Xanana
Gusmão ko'alia iha Singapura akompaña hosi líder sira hosi partidu opozisaun
rua seluk, Taur Matan Ruak, prezidente hosi Partidu Libertasaun Popular (PLP)
ho José dos Santos Naimori, líder hosi Kmanek Haburas Unidade Nacional Timor
Oan (KHUNTO).
Hanesan
enkontru dahuluk ho rejistu hosi imajen sira hosi líder sira hosi partidu tolu
ne'ebé hamutuk no hakarak sai hanesan alternativu hosi Governu no deklarasaun
públiku dahuluk hosi Xanana Gusmão alargadu kona-ba situasaun polítika dezde
nia sai hosi Timor-Leste, iha loron 11 Setembru liubá.
"Ami,
líder sira hosi partidu sira, ami prontu atu hasoru ho situasaun susar. Ami,
líder sira hosi partidu polítiku sira senti responsabilidade boot hodi prepara
aan hodi rezolve situasaun no krizi polítika ne'e ba povu nia di'ak",
afirma hosi Xanana Gusmão.
"Kompeténsia
hodi rezolve situasaun ne'e iha Prezidente Repúblika, doutor Francisco Guterres
Lu-Olo, nia liman. Ha'u hein katak sei kumpri Konstituisaun no ami sei fó apoiu
tomak hodi nune'e kumpri Konstituisaun, ne'ebé hanesan garanti hosi Estadu no
nasaun", nia hatete.
Iha
intervensaun, Xanana Gusmão diriji ba "povu tomak Timor-Leste nian"
no liuliu ba militante sira hosi partidu tolu iha mensajen ida "konfiansa
nian".
"Prezidente
Repúblika hatete ona katak senti orgullu ba aspetu pozitivu sira hosi
situasaun, tanba sosiedade hahú diskuti Konstituisaun, hahú komprende prosesu
hosi konstrusaun Estadu nian. Ami na'in tolu konkorda ho afirmasaun hosi
Prezidente Repúblika. Situasaun halo parte hosi prosesu konstrusaun Estadu nian
no konstrusaun nasaun nian", nia hatete.
Afirma
katak povu timoroan "labele preokupa" ho situasaun no agradese ba
"maturidade polítika maka'as" ne'ebé maka hatudu, Xanana Gusmão
hatete ona katak líder polítiku sira dedika hela "hodi rezolve situasaun",
hodi refere mós ba komentáriu sira kona-ba polémika CNRT-PLP.
"Iha
beibeik espekulasaun barak kona-ba partidu tolu. Ohin ami iha na'in tolu iha
ne'e hodi kompromete ba povu tomak. Ami asumi responsabilidade ba imi hotu,
responsabilidade no dever hodi serbi. Ne'e hanesan ami nia kompromisu ba povu
tomak, ba kompañeiru sira hosi KHUNTO, PLP ho CNRT", nia hatete.
Anúnsiu
hosi koligasaun opozisaun nian hamosu hakfodak tanba Xanana Gusmão hatete
beibeik ona hodi garanti katak partidu sei la halo parte hosi koligasaun ruma
Governu nian, no tanba tensaun ne'ebé mosu relasionadu ho Xanana Gusmão ho Taur
Matan Ruak, hafoin Taur Matan Ruak kompara tiha líder istóriku ho ditador
indonéziu Suharto.
Hafoin
diskursu ne'e, Xanana Gusmão hafoin ne'e fó fali duni ba xefe Estadu medalla
ida ne'ebé maka fó ba nia tanba serbisu sira ba nasaun.
"Iha
ema balun ne'ebé hatete katak hafoin tensaun entre Xanana ho Taur, agora iha
akordu ida. Ita hotu hanesan ema moris no hanesan normal. Bainhira interese
nasional afeta ami na'in rua, no maski hosi diferensa sira, ki'ik, entre ami
na'in rua, ami tenki iha korajen no mantén kompromisu", nia afirma iha
loron-tersa ne'e.
"Bloku
tenki prepara aan hodi hatán ba situasaun ne'ebé maka ita hasoru. Ami prontu.
AMP senti prontu. Ami la obriga buat ida ba PR, hdoi viola Konstituisaun. Maibé
ne'e hanesan kompromisu boot ida: bainhira AMP iha konfiansa polítika, ami sei
asumi responsabilidade hodi serbi nasaun, serbi povu ho luta ba Estadu nia
di'ak", nia garanti.
Deklarasaun
halo iha enkontru ida iha findesemana ne'e iha Singapura no fó sai liutiha oras
24 hafoin opozisaun aprezenta tiha proposta sensura ida hasoru Governu.
Governu
minoritáriu apoia hosi deputadu na'in 23 hosi Frente Revolucionária do
Timor-Leste Independente (Fretilin) no deputadu na'in hitu hosi Partidu
Demokrátiku (PD) no iha loron 19 liubá nia programa la liu tanba proposta
rejeisaun ida.
Bainhira
proposta sensura nian hetan aprovasaun, sei demiti Governu no Prezidente
Repúblika, Francisco Guterres Lu-Olo, tenki hili entre solusaun governativu
foun iha atual senáriu parlamentar ka konvoka eleisaun antesipadu sira.
SAPO
TL ho Lusa
Sem comentários:
Enviar um comentário