Akordu anterior sira entre
Timor-Leste ho Austrália kona-ba rekursu sira hosi Tasi Timor permiti ona ba
Díli hodi hetan reseita biliaun 30 resin ne'ebé finansia ona Estadu iha tinan
10 ikus ne'e, hatete hosi primeiru-ministru timoroan iha loron-tersa ne'e.
Tanba ne'e, Mari Alkatiri
defende, iha entrevista ho Lusa, bainhira laiha akordu sira sei laiha
posibilidade atu iha kondisaun hodi hetan akordu istóriku ne'ebé defini liña
permanente hosi fronteira entre nasaun rua no ne'ebé maka sei asina iha
loron-tersa, iha Nova Iorke.
"Akordu sira ne'e hanesan
importante tebes tanba permiti ona gasta durante tinan 10 resin osan dolar
biliaun 13 ne'ebé mai hosi [posu] Bayu Undan no lahó akordu ne'e sei laiha
kondisaun sira hodi gasta maka'as", afirma hosi xefe Governu.
"Karik até di'ak liu labele
gasta maka'as. Maibé verdade maka osan mai hosi fatin ne'e no lahó osan ne'e
ami sei labele selu advogadu sira luxu nian ne'ebé maka ami iha hodi halo
negosiasaun ba tratadu ne'e", nia hatete.
Deklarasaun sira hosi Alkatiri
mosu iha loron ne'ebé, iha Nova Iorke, Timor-Leste ho Austrália asina
"Tratadu entre Austrália ho Repúblika Demokrátika Timor-Leste nian ne'ebé
estabelese sira nia limiti marítimu iha tasi Timor nian".
Tratadu sei asina hosi atual
ministru Adjuntu hosi primeiru-ministru ba Definisaun Fronteira nian, Agio
Pereira, no hosi ministra Negósiu Estranjeiru australiana, Julie Bisho, no sei
asisti hosi Sekretáriu-jeral ONU nian, António Guterres, no prezidente Komisaun
Konsiliasaun nian, Peter Taksøe-Jensen, ne'ebé halo mediasaun ba negosiasaun
sira entre nasaun rua ne'e.
Dokumentu ne'e negosia ona hosi
ekipa ida ne'ebé lidera hosi Xanana Gusmão, ne'ebé sei la marka prezensa iha
serimónia, maibé hetan felisitasaun tanba susesu ne'ebé hetan hosi asaun ne'ebé
maka ema barak hatete hanesan imposível, tanba pozisaun ne'ebé maka Austrália
hatudu to'o agora.
"Hahú hosi momentu ne'ebé
maka rekuza asina, ha'u hahú konklui katak sei la marka prezensa. Ha«'u hanoin
katak ladún kontente ho solusaun ne'ebé hetan. Hakarak liután, hakarak gazodutu
mai Timor, no maski ho Timor hakarak 100% hosi Sunrise. Ne'e sai nafatin
hanesan objetivu. Xanana hatene katak sei la fásil", nia hatete.
Iha semana hirak ikus ne'e,
Alkatiri hetan nafatin akuzasaun hosi partidu balun opozisaun nian no iha rede
sosial sira tanba la konsege iha negosiasaun anterior sira, ne'ebé nia rasik
lidera ho Austrália, no iha tinan 2002 hetan asinatura ba Tratadu Timor Gap no,
iha tinan 2006 hetan Tratadu kona-ba Determinadu Ajuste Marítimu iha Tasi Timor
(CMATS).
"Hanesan polítika baratu,
polítika infeliz, polítika hosi kioske hosi sé maka la hatene sukat asaun sira.
Lahó fronteira definidu, ha'u konsege de'it 90-10. No maski ho fronteira
definidu, ami sei la konsege liután ida ne'e. No ba Fundu Petrolíferu tama ona
dolar biliaun 30. Ha'u sei iha dúvida atu Sunrise bele fó ne'e", afirma
hosi Alkatiri.
"Ha'u seidauk rona hosi
Xanana tentativa ruma hodi estraga ne'e. Iha ema ruma ne'ebé hakarak halo
daudaun asaun ne'e. Tanba sira halo polítika ida ne'ebé laiha responsabilidade,
la ajustadu ho realidade. Xanana halo hela negosiasaun hodi Estadu no Governu
nia naran. Bainhira iha mamuk ida iha governasaun, sei laiha negosiasaun
sira", nia konsidera.
Alkatiri hetan mós akuzasaun hodi
favorese opsaun hosi gazodutu Greater Sunrise nian ba Darwin, akuzasaun ne'ebé
maka nia rejeita tebes, hodi afirma katak líder sira nasaun nian konkorda
nafatin iha objetivu hodi lori gazodutu to'o iha súl Timor nian.
"Ha'u nunka defende gazodutu
ba Darwin tanba ne'e sei la hamosu negosiasaun sira ne'e. Ezijénsia hosi
gazodutu mai Timor trava ona esplorasaun hosi Sunrise no permiti ona hafoin
tinan 2013 ba sé maka iha Governu hodi bele foti opsaun foun sira", nia
hatete.
Alkatiri, lakohi hatete detalle
kona-ba dokumentu, ne'ebé sei hanesan konfidensial to'o loron asinatura,
konsidera akordu hanesan "vitória substansial" ne'ebé permiti ba
Timor-Leste "hatene la'o to'o iha ne'ebé" no ne'ebé tau posu sira
Greater Sunrise nian iha bee timoroan nian.
"Hanesan liña medianu ida
ne'ebé la'ós hanesan total, maibé ne'e hanesan rezultadu hosi negosiasaun sira.
Ha'u nunka iha iluzaun sira katak ne'e tenki sai duni hanesan ami nia hakarak,
hodi konsidera dimensaun hosi nasaun rua. Iha direitu internasional, sei hanoin
buat sira ne'e", nia afirma.
"Buat ne'ebé maka bele husu
agora maka bainhira Sunrise iha 100% iha ami nia fronteira sira tansá maka ami
tenki fó 20 ka 30% ba Austrália? Ho ata sira hosi negosiasaun sira maka bele
rezolve ne'e", nia afirma.
Informasaun sira ne'ebé Lusa
hetan hatudu katak akordu entre nasaun rua kalkula katak Timor-Leste simu 70%
hosi reseita Sunrise nian bainhira gazodutu ba Timor-Leste no 80% bainhira ba
Darwin.
"Hahú hosi ratifikasaun hosi
nasaun rua ba akordu ne'e, posu sira hotu sai 100% ba Timor-Leste. Sei laiha
fahe rekursu sira ka reseita sira", nia afirma.
Kona-ba reseita sira ne'ebé
Timor-Leste sei simu hosi posu sira ne'e, Alkatiri hatete katak sei hanesan
"susar tebes" iha previzaun ida.
SAPO TL ho Lusa
Sem comentários:
Enviar um comentário