Xanana Dehan Luta Hasoru Austrália Seidauk Remata

DILI: Timor Leste no Austrália hakotu ona delimitasaun fronteira marítima permanente entre rai rua ne’e, maibé ekipa negosiadór Timor-Leste la satisfás ho rezultadu esplorasaun Greater Sunrise nian ne’ebé la sita klaramente iha akordu ne’ebé asina ona.

Ne’e duni, Xefe Negosiadór Prinsipál Delimitasaun Fronteira Marítima, Kay Rala Xanana Gusmão, husu nafatin ba povu Timor-Leste atu kontinua luta hasoru Austrália hodi define loloos esplorasaun kampu mina matan Greater Sunrise bele dada mai Timor.

Hafoin nasaun rua ne’e deside fronteira marítima, seidauk iha definisaun klaramente kona-ba futuru esplorasaun kampu Greater Sunrise nian. Timor-Leste no Austrália hotu-hotu ‘hadau-malu’ atu ida-idak bele dada ba ninia área.

Xanana dehan, povu Timor Leste tenke defende riku-soin. Iha enkontru ne’ebé Estadu rai rua realiza iha Kuala Lumpur, Malázia, deside ona destinu Greater Sunrise maibé laiha solusaun.

“Funu seidauk hotu! Fronteira iha tiha ona no ita tenke kaer metin ita nia riku-soin,” deklara Xanana, iha sede CNRT, Bairru-Grilos, horisehik.

Kona-ba enkontru iha Malázia, atu deside mina matan Greater Sunrise prosesu ne’e sei naruk no seidauk iha desizaun. Maibé, hakarak ka lakohi Timor leste tenke manan ba mina matan.

“Iha ita nia funu ne’e ita la rende no ita tenke manan hodi ka’er metin ita nia riku-soin,” deklara Xanana.

Tanba ne’e, povu Timor-Leste tenke esforsa aan kontinua funu tanba prosesu seidauk to’o rohan.

Ho oin midar, nia dehan, ema barak mak hakilar hodi husu obrigadu, maibé balun kontinua iha prosesu nia laran. Di'ak liu husu agradese ba advogadu Timor Leste ho ekipa negosiadór ne’ebé defende diretu ne’e.

Timor-Leste kontinua hakat tuir ain-fatin asuwa'in sira ne’ebé uluk luta ba nasaun ne’e konsege hetan independensia. Luta ne’ebe oin loron halo neé hodi defende riku-soin Timor nian, ne’ebe balun kontinua iha prosesu laran.

Xanana husu ba povu Timor tenke reza makaas hodi husu tulun ba Maromak, nune’e mós harohan ba matebian sira no mós rai lulik no fatuk lulik sira hodi haforsa nune’e hadau riku-soin Timor nian iha tasi laran ne’ebá. 

Independente