MAP Apoiu Tratór Ba Grupu Agrikultór Maubisse

MAUBISSE, (TATOLI) - Ministériu Agrikultura no Peskas (MAP) apoiu tratór ida ho marka ZOOMLION RM854 ba Grupu Komunidade Agrikultór Maubisse atu fila rai kuda aihan tanba komunidade ne’e halo produsaun ekonomikamente viável.

“Tratór ne’ebé maka MAP entrega ne’e apoiu hosi Governu Xina. Tratór ida ne’e la’ós fó arbiru de’it maibé liuhusi vizita ida ne’ebé maka to’o iha fatin ida Tolulefa (area Maubisse) tanba fatin ne’ebá rai tetuk, rai bokur atu halo atividade agrikultura,” Ministru Agrikultura, Estanislau Aleixo da Silva dehan kestaun ne’e altura entrega tratór ba Grupu Komunidade Agrikultór Maubisse liuhusi konsultasaun Programa Sétimu Governu Konstitusionál ne’ebé hala’o hosi Primeiru Ministru, Marí Alkatiri no membru Governu sira iha Salaun Parókia Maubisse, Postu Administrativu Maubisse, Munisípiu Ainaro, Sesta (9/3).

Durante ne’e, tuir nia haree, komunidade Tolulefa fila rai kuda morangu (strawberry) ho aihoris sira seluk uza ekipamente tradisionál de’it hanesan aisuak no ensada,  no ida ne’e la fó sustentabilidade produsaun iha futuru.

“Primeiravez MAP entrega tratór boot ba Grupu Komunidade Agrikultór. Ne’e responsabilidade boot ba grupu tanba sira maka sei tau matan ba tratór ne’e ka halo manutensaun rasik,” Estanislau esplika.

Jornalista: Xisto Freitas | Editór : Manuel Pinto

Imajen: Tratór ne’ebé MAP apoiu ba Grupu Komunidade Agrikultór Maubisse. Imajen Ajénsia Tatoli/Xisto Freitas).