quarta-feira, 23 de maio de 2018

Kadalak Lamenta Atitude Iresponsável Visitante Ramelau


DÍLI, (TATOLI) - Organizasaun Kadalak Timor, ne’ebé estabelese ho inisiativa husi seminarista sira, lamenta tebes ho atitude iresponsável husi vizitante relizioju balun ba foho no santuáriu na’in feto Ramelau, tanba so’e fo’er arbiru de’it no hakerek riskadu aat tan fasilidade balun, ne’ebé antes ne’e, ASEMA (Asosiasaun Estudante Munisípiu Ainaro) prepara.

“Ha’u nu’udar reprezentante kadalak ami sente triste ho hahalok ida ne’e,” espresa prezidente Kadalak, Natalino de Jesus Dias ba Ajénsia TATOLI via telefone, ohin.

Natalino haktuir, nia pesoalmente, lori ona grupu balun ba santuáriu na’in feto Ramelau, maibé sira sempre enkoraja no fó hanoin ba malu. Katak, ita mai fatin ne’e moos, ita fila mós tenke husik hela moos.

Atu nune’e, ema seluk mai karik bele sai ezemplu ba sira no ida tan mak bele hatudu ba ema estranjeiru sira katak ita mós hatene hadomi ambiente no hatene tau fo’er tuir nia fatin; hatudu sivizmu.

Nia informa mós katak alende so’e fo’er, iha mós ema iresponsável balun hakerek sira-nia naran iha estatua na’in feto nia ain, iha mós kuadru avizu ne’ebé ASEMA monta.

“Ha’u sente triste tanba ita mesak joven de’it mak ba vizita santuáriu hodi selebra loron restaurasaun indepedénsia Timor-Leste nian bada la 16, maibé hatudu imajen laduun di’ak no soe fo’er arbiru,” lamenta prezidente Kadalak, Natalino de Jesus Dias.

Ho hahalok ne’ebé la “afavór” ba ambiente ne’e, ezekutivu Kadalak Timor, Natalino Dias de Jesus sujere ba administradór postu administrativu Hatubuilico atu kria regra ida ne’ebé forte.

Nune’e mós, padre sira ne’ebé mak toma konta iha área pastorál, iha kuaze parókia Hatubuilico, inklui autoridade lokál atu bele kria regra ida forte tebes ba sidadaun ne’ebé de’it mak vizita santuáriu Ramelau.

Seluk mak atu hahú minimiza hahalok sira husi ema iresponsável sira, importante tenke halo formasaun kontinua liuhusi edukasaun formál nomós naun-formál sira iha ne’ebé de’it no ba se de’it.

“Formasaun ne’e bele iha eskola, iha komunidade no ba se de’it. Formasaun husi profesór sira, sosializasaun (sensibilizasaun) husi sekretáriu estadu asuntu ambiente no Ministériu Turizmu,” akresenta prezidente Kadalak, Natalino Dias.

Jornalista: Rafy Belo | Editór: Manuel Pinto

Imajen: ASEMA lori materiál balun ho la’o ain, ho distánsia dook lori ba monta iha Ramelau hodi kuidadu. Foto FB: Amadeu Dures

Sem comentários: