SEJT rekomenda ba VIII Governu tau prioridade ba saláriu mínimu

Sekertariu Estadu Juventude no Traballu (SEJT), Nivio Magalhães, husu ba VIII Governu mai atu tau prioridade ba hasa’e saláriu mínimu traballador no kria fundu ba juventude hodi apoia juventude sira oinsa dezenvolve sira-nia an liu husi atividade no formasaun oi-oin, tanba juventude mak futuru ba nasaun.

Tanba saida mak ha’u hakarak husu ba Governu foun mai atu tenki tau prioridade hirak ne’e, tanba asuntu rua ne’e importante, oinsa ita-nia emprezariu Internasional no nasional sira mai loke sira-nia usaha (Empreza) iha ne’e ita tenki presija traballador, no oinsa traballador sira atu servisu ho diak, sira mos tenki hetan saláriu ne’ebé diak tuir estandar ne’ebé mak Governu fo sai. Tanba saida mak ha’u hakarak tenki kria fundu rasional ida ba sira? tanba atu ita bele iha juventude ida ne’ebé prontu uza, ”dehan Nivio Magalhães, ba GMN iha nia servisu fatin Caicoli, foin lalais ne’e.

Alende ne’e, nia mos husu ba Governu foun atu mantein ho programa Parlamentu Foinsae (PF) ne’ebé durante ne’e iha, tanba liu husi juventude Parlamentar, TL bele iha fini diak nasaun nian iha tempu oin mai.

Ida ne’e importante tebes, husu ba Governu liu husi Autoridade local, Ministeriu Edukasaun atu identifika juventude sira ne’ebé mak bele sai matan, tilun no ibun ba sira-nia komunidade nian liu husi Parlamentu Foinsae, no bele sai fini nasaun nian iha loron aban bainrua nian, hatutan Nivio.

Nia dehan, Governu iha kompetensia atu sasan hotu ba nia povu liu-liu juventude, ne’ebé sempre sai autor ba dezenvolvimentu. Tanba ne’e, tenki hetan kapasitasaun no formasaun ne’ebé diak no inkluzivu.

Ita mos tenki hare’e sentru treinamentu hotu iha TL laran, atu bele kria sentru juventude ida ne’ebé mak multi funasaun, atu sai fatin ida ba juventude sira oinsa sira bele aprende kona ba lingua, kona ba arte múzika, kona ba kultura no kona ba edukasaun sívika no seluk tan, nia dehan.

Alende ne’e, nia mos husu ba Governu foun atu asegura lei traballu ne’ebé mak iha, nune’e entidade hotu tenki hakruk ba lei ne’ebé mak iha.

Ema hotu tenki hakruk ba lei ne’e, no ami sempre hateten katak, laiha toleransia ba se deit ne’ebé mak viola lei  traballu. implementasaun ida ne’e labele iha preferensia, labele haree ba família no labele haree ba partidu, nune’e hotu-hotu tenki hakruk ba lei tantu mai husi estranjeiru, nia sujere. Ola

GMN TV | Grupo Média Nacional