COVALIMA, (TATOLI) - Ministru
Prezidénsia Konsellu Ministru, Adriano Nascimento hato’o apresiasaun ás no
agradesimentu wa’in ba povu Covalima ne’ebé fó ona biban ba nia nu’udar
Covalima oan ne’ebé sai ministru ba dahuluk iha istória polítika Covalima nian.
“Ohin loron ida ne’e nu’udar
oportunidade primeiru no ikus liu ona ba ha’u hodi reprezenta Governu sentrál
iha eventu istóriku ida ne’e hanesan Ministru Prezidénsia Konsellu Ministru,
basá eleisaun antesipada hotu ona tuir nia tempu no nia dalan. Nune’e, mandatu
Sétimu Governu Konstitusionál to’o ona iha nia rohan no ninin hodi kahe no
hatuur hikas iha sira seluk nia kabaas,” Adriano hato’o apresiasaun iha Komemorasaun
Loron Restaurasaun Independénsia ba dala XVI ne’ebé hala’o iha Kampu Futeból
Ladi, Suai, Munisípiu Covalima, domingu ne’e, hafoin lee testu hosi Prezidente
Repúblika kona-ba Restaurasaun Independénsia.
Nia mós lori Primeiru Ministru,
Marí Alkatiri no membru Sétimu Governu nia naran hato’o apresiasaun ás no
agradesimentu wa’in ba povu Covalima no povu Timor-Leste tomak ne’ebé fó ona
apoiu signifikativu hodi materializa sétimu Governu nia ukun durante fulan
ualu.
“Karik durante ukun, ami nia
liafuan no ami nia hahalok ruma maka la monu iha povu Covalima no povu Timor
laran tomak nia futar oin, ami husu perdaun no husu mós perdaun tanba ho
dezafiu polítiku ne’ebé iha ami la konsege implementa programa ukun nian,”
Adriano tenik.
Nia konxiente katak ukun ida ne’e
todan atu foti no susar atu kahe iha sira nia misaun polítika tanba sira
enfrenta dezafiu polítiku no orsamentál.
Maski nune’e, Adriano informa,
sira nia espíritu atu serbí, patriotizmu atu liberta povu no nasionalizmu atu
dignifika nasaun sei la mihis ka la mout hosi dezafiu polítiku ne’ebé eziste.
Serimónia isár bandeira hala’o
iha tuku 09:30-10:45 Otl. Partisipa iha komemorasaun ne’e maka membru
autoridade munisipál, autoridade lokál, estudante sira hahú hosi sekundáriu
to’o universitáriu, membru Polísia Nasionál Timor-Leste no komunidade Covalima.
Jornalista: Xisto Freitas | Editór:
Manuel Pinto
Imajen: Ministru iha Prezidensia
Konsellu Ministru (MPKM), Adriano do Nascimento. Foto Antonio Goncalves
Sem comentários:
Enviar um comentário