segunda-feira, 21 de maio de 2018

PR: Ha’u Tuir De’it Konstituisaun

PARTILHAR

DILI, (TATOLI) – Prezidente Repúblika, Francisco Guterres Lú Olo, iha komemorasaun ba restaurasaun indepedénsia dala 16 akresenta hafoin loron ne’ebé hanesan simu pose nu’udar xefe estadu, Nasaun hasoru situasaun polítika foun ida ne’ebé hamosu obstakúlu atu aprovasaun lei no meiu konstitusionál selseluk ne’ebé importante tebes, hodi bele ukun, hatutan ukun.

“Ha’u enfrenta dezafiu foun ne’e hodi foka ba preokupasaun fundamentál rua no prioridade rua mak hanesan, primeiru ha’u tuir de’it konstituisaun Repúblika Timor-Leste nian no segundu halo tuir kompromísiu sira ne’ebé ha’u halo ba Nasaun, hodi bainhira simu kna’ar nu’udar xefe estadu nian”, dehan Prezidente Repúblika iha Palásiu Governu, ohin.

Xefe estadu akresenta nia halo konsultasaun ne’ebé kle’an ho sosiedade sivíl no tau konsiderasaun ba interese nasionál.

“Ha’u halo avaliasaun ba kondisaun estabilidade sosiál no estabilidade polítika iha parlamentu, ne’ebé nesesáriu hodi asegura kondisaun sira ne’ebé presiza hodi lori ba oin ita-nia prosesu nasionál atu dezenvolve nasaun no diversifika ita-nia ekonomia nasionál”, katak tan.

Lú Olo hatutan konstitusaun sai matadalan ba ninia reflesaun, kona-ba kompromísiu sira ne’ebé mak nia foti hodi bainhira toma pose, garante unidade Estadu nian no karater unitáriu Repúblika Demokrátika Timor-Leste nian no hala’o kna’ar atu halibur povu tomak; sei la haree ba ema nia partidu no estatutu sosiál no ekonómiku, relijiaun ka etnia.

“Ne’e katak ha’u-nia kompromísiu atu sai prezidente hanesan sai prezidente hothotu nian no ba ema hothotu, ba timoroan hothotu”, garante.

Prezidente Repúblika realsa foti konkluzaun ba avalisaun ne’ebé nia halo katak presiza halo konsultasaun foun ho sidadaun hodi rezolve situasaun polítika no klarifika didi’ak sidadaun sira-nia vontade.

Klaru, desizaun Eleisaun Antesipada lori risku balun, tanba iha momentu ne’ebá, la posível atu hatene loloos eleitór sira simu oinsá loos. Maibé, buka kondisaun hodi hametin estabilidade no dame hanesan dever ita hotu nian, sidadaun sira nian, ulun-boot sira nian no orgaun soberania sira hothotu nian tuir kompeténsia ne’ebé mak sira iha, katak tan.

“Sidadaun sira hatan ba dezafiu ne’e ho maturidade, espiritu toleránsia no vontade atu fó liman ba malu, iha dame nia laran”, louva.

Eis-Prezidente Parlamentu Nasionál haktuir durante prosesu ba realizasaun Eleisaun Antesipada, hahalok sidadaun nian iha teritóriu hatudu hakmatek no maturidade, hahí Timor-Leste nia naran iha rejiaun no iha mundu.

Sidadaun timoroan sira sai ona ezemplu di’ak ida ba ema hothotu, inklui ulun-boot sira atu banati tuir ohin loron no ba aban bainrua nian, katak tan.

“Husi ha’u-nia parte nu’udar xefe estadu hodi hala’o ha’u-nia kompeténsia sira, ha’u fó hanoin hikas fila fali katak iha ita-nia sistema konstitusionál, prezidente repúblika la’ós de’it símbolu Nasaun ida nian maibé mós orgaun soberania ida ne’ebé kaer responsabilidade aas liu atu lori ita-nia rain ida ne’e ba dalan estabilidade no garante sistema polítiku atu la’o ba di’ak”, afirma tan.

Jornalista: Rafy Belo | Editora: Rita Almeida

Imajen: Prezidente Repúblika, Francisco Guterres, Lú-Olo
PARTILHAR

Author: verified_user

Publicação luso-timorense sem fins lucrativos

0 comentários: