Xanana Gusmão kritika kritériu sira Prezidente Timor-Leste nian iha nomeasaun Governu nian

Líder koligasaun nian ne'ebé manán lejislativu timoroan iha fulan-Maiu, Xanana Gusmão, akuza ona Prezidente Francisco Guterres Lu-Olo, iha loron-sesta ne'e, ba pozisaun "inkrível, invulgar, sedisiozu ho politizadu" bainhira desidi la fó pose ba membru na'in 11 ba Governu foun ne'e.

Xanana Gusmão nia pozisaun, ne'ebé hanesan protestu lakohi simu pose nu'udar ministru Estadu ho konselleiru hosi primeiru-ministru, hato'o ho detalle iha karta ida ho pájina haat ne'ebé nia rasik haruka ona ba primeiru-ministru nomeadu, Taur Matan Ruak, no ne'ebé maka Lusa iha asesu.

Karta ne'e hanesan resposta hosi karta ida ne'ebé Lu-Olo haruka ona ba primeiru-ministru ne'ebé nomeadu hosi Aliansa Mudansa ba Progresu (AMP), konfirma katak hakarak fó de'it pose ba parte balun hosi elenku governativu ne'ebé maka hato'o hosi Taur Matan Ruak.

Exkluzaun ne'e desidi hosi Prezidente timoroan ba membru na'in sanulu resin ne'ebé maka hato'o hodi halo parte iha Governu foun hamosu ona "situasaun ladi'ak" no krítika maka'as iha koligasaun ne'ebé apoia ezekutivu nia laran, informa ona hosi fonte partidáriu sira.

Iha karta, Xanana Gusmão refere ona katak xefe Estadu husu ona ba "instituisaun kompetente sira hodi verifika ezisténsia hosi inkéritu kriminal, akuzasaun definitivu ka kondenasaun judisial relasionadu ho individualidade ne'ebé maka tama iha lista hodi halo parte iha Governu konstitusional daualuk".

"Ha'u la haree nia halo asaun ne'e ho Governu dahitu", Xanana Gusmão hakerek no refere ba ministru sira Mariano Sabino, António da Conceição, Aurélio Guterres ho Estanislau da Silva no ba xefe gabinete hosi primeiru-ministru Mari Alkatiri nian, Nelson Santos.

"Iha ne'ebá, kredibilidade hosi xefe Estadu no hosi Estadu rasik seidauk funsiona", Xanana Gusmão subliña.

Iha dokumentu, Xanana Gusmão kestiona kritériu sira ne'ebé Prezidente uza, hodi haree katak entre ema sira ne'ebé nia hasai iha ona sidadaun ida ne'ebé kumpri ona kastigu ba kondenasaun ida ne'ebé hetan no na'in haat seluk "ne'ebé nunka hetan akuzasaun formal ka nunka sai arguidu".

Iha mós na'in rua ne'ebé sai ona arguidu maibé lahó markasaun ba julgamentu, ida hetan kondenasaun ba ilegalidade ida "lahó relasaun ho ezersísiu hosi funsaun públika nian", nia refere.

Iha karta ida ne'ebé nakonu ho ironia no ne'ebé maka nia refere ba kazu polémiku oioin iha Timor-Leste, inklui ida ne'ebé maka envolve hosi prokurador-jeral Repúblika rasik, Xanana Gusmão ataka postura oinseluk ne'ebé maka Prezidente uza hodi nomeia membru sira hosi Governu Fretilin nian.

Iha konkretu, Xanana Gusmão refere, Prezidente sei la fó pose ba ema oioin ne'ebé nomeadu ba Governu daualuk tanba, deskonfia, envolve iha kazu judisial sira, no ne'ebé nia la aplika ideia hanesan iha Governu dahitu ne'ebé lidera hosi Fretilin.

AMP harii hosi Congresso Nacional da Reconstrução Timorense (CNRT), hosi Xanana Gusmão, hosi Partidu Libertasaun Popular (PLP), hosi Taur Matan Ruak no hosi Kmanek Haburas Unidade Nacional Timor Oan (KHUNTO).

Parte barak hosi membru sira Governu nian ne'ebé Prezidente la hili hanesan elementu sira hosi CNRT, partidu úniku hosi partidu tolu ne'ebé maka halo ona parte hosi governu anterior sira.

Xanana Gusmão hakotu karta hodi konfirma katak nia no mós membru sira seluk hosi CNRT sei la partisipa iha tomada pose.

Fonte hosi CNRT konfirma ona ba Lusa katak protestu ne'e bele aumenta "iha solidariedade" ba membru sira seluk hosi partidu nian ne'ebé kontrola kadeira hamutuk 21 hosi kadeira 34 AMP nian iha Parlamentu Nasional.

SAPO TL ho Lusa