Primeiru-ministru foun timoroan
nian, Taur Matan Ruak, promete ona iha loron-sesta katak nia ezekutivu sei
hanesan ajente mudansa ida no "motor" ida mudansa nian, aposta iha
utilizasaun di'ak hosi rekursu sira no hadi'a sidadaun sira nia moris.
Taur Matan Ruak ko'alia hafoin
simu pose nu'udar primeiru-ministru hosi Governu konstitusional daualuk,
serimónia ne'ebé nia agradese ona ho "honra, humildade tebes no sentidu
dever maka'as" tanba líder sira hosi AMP, liuliu Xanana Gusmão ho José
Naimori, hili nia ba kargu.
Iha diskursu ida esperansa nian,
ne'ebé nia hatete ona katak iha buat barak atu halo iha área oioin asaun
públiku nian, Matan Ruak defende ona katak hakotu ona "momentu tensaun
nian no to'o ona momentu koperasaun nian" tanba, bainhira laiha esforsu
hamutuk, sei la kumpri objetivu sira dezenvolvimentu nian.
"Hodi hetan kauza nasional
boot ne'e, tenki mobiliza no halibur forsa únika, vontade úniku no mehi hanesan
ida ba sidadaun tomak, entidade sira ho forsa produtivu sira", nia hatete.
"Ema hotu tenki partisipa.
La'ós hanesan momentu tensaun nian maibé koperasaun nian, mobilizasaun hosi
vontade sira hodi manán. Tempu uniaun nian ba ema tomak", nia afirma.
Nia hatete hatete katak nasaun
hasoru "momentu desizivu" ne'ebé hanesan importante aumenta esforsu
sira hodi hadi'a moris di'ak populasaun nian, buka garanti "utilizasaun
di'ak ida hosi dalan ho rekursu sira ne'ebé disponível ba ema tomak nia
di'ak".
Nia konsidera katak ne'e sai ona
no kontinua nafatin hanesan "anseiu lejítimu" hosi populasaun ne'ebé
"hakarak sai hosi hamlaha no kiak", afirma hosi primeiru-ministru.
Governu daualuk - ne'ebé elementu
na'in 28 simu pose iha loron-sesta ne'e - hakarak hanesan "lokomotivu ida
inkluzaun nian no kapasitasaun sosial ne'ebé la aposta de'it iha aumentu
ekonómiku maibé, liuliu, iha kapital sosial, iha infraestrutura báziku sira no
iha governasaun kriteriozu di'ak ida, ho rezultadu, efisiente, hosi rekursu
oituan sira ne'ebé iha".
"Motor ida oportunidade nian
no esperansa ne'ebé rekoñese katak nasaun la la'o ba oin bainhira ema balun
de'it maka moris di'ak no iha grupu fraku oioin kontinua moris ho susar
maka'as", nia hatete.
Hodi konsidera kapital sosial ho
populasaun ne'ebé maioria joven iha nasaun, hanesan "rikusoin loloos"
Timor-Leste nian, primeiru-ministru hatete katak konfiante iha projetu
"mobilizador no iha orientasaun hosi nia vizaun estratéjiku".
"Tempu ba falta diálogu
nian, hosi inkumprimentu ba problema sira, hosi krizi, hanesan ona
pasadu", nia hatete hodi refere ba situasaun polítika iha tinan ikus ne'e
ne'ebé hamosu realizasaun ba eleisaun antesipadu.
Nia defende katak agora presiza
"kompromisu nasional ida ho diálogu" hodi buka "negosiasaun no
konsertasaun" liuliu iha kestaun sira ba interese nasional.
Matan Ruak hatete katak Governu foun
sei la sai "refém hosi difikuldade ne'ebé hato'o hosi Governu anterior
sira ne'ebé maka la kompatível ho interese sira nasaun nian.
Xefe Governu promete ona esforsu
"maka'as ida" hodi "liberta povu hosi kiak, hosi hamlaha no hosi
falta oportunidade nian", ho programa "ambisiozu" ida ne'ebé,
tuir nia hatete, sei sentradu iha sidadaun sira nia moris di'ak, iha aumentu
hosi produtividade, hamenus importasaun sira, governasaun di'ak no "konta
públika transparente ho ekilibradu".
Hametin diversifikasaun ekonómiku
ho kriasaun empregu, investe iha área sira ne'ebé produtivu liu, hanesan
agrikultura ho turizmu, ajuda harii ambiente di'ak ida ba negósiu no dada
investimentu, hanesan prioridade balun.
"Labele admiti falta
oportunidade serbisu nian hodi halo joven sira sai ba estranjeiru. Ita iha
obrigasaun moral ho dever hodi hatán ba aspirasaun sira juventude nian",
nia afirma no kompromete katak Governu sei promove igualdade jéneru ho
inkluzaun.
Formasaun hosi baze no formasaun
vokasional, aumenta poténsia ba uzu hosi rekursu natural sira, investe nafatin
iha projetu dezenvolvimentu iha kosta-súl, desentralizasaun ho reforsu hosi
infraestrutura baze sira halo parte mós hosi programa, nia esplika.
Iha parte seluk, Taur Matan Ruak
kompromete ona Governu ba "responsabilidade importante tolu":
komunika hodi permiti debate maka'as kona-ba opsaun no polítika sira ne'ebé la
hanesan; apoia sidadaun sira no entidade sira ne'ebé dedika ba monitorizasaun
ho vijilánsia hosi Estadu no "transparénsia iha ezekusaun orsamental
nian".
SAPO TL ho Lusa
Sem comentários:
Enviar um comentário