Governu timoroan aprova ona, iha
loron-kuarta ne'e, iha Konsellu Ministru proposta hosi lei ida hodi husu
autorizasaun ba parlamentu ba levantamentu ida hamutuk dolar millaun 140 (euro
millaun 110 resin) hosi Fundu Petrolíferu hodi reforsa kofre sira Estadu nian.
Proposta aprezenta hosi
visi-ministra Finansa, Sara Brites, iha hanoin hodi rezolve krizi finanseiru
ne'ebé maka Estadu hasoru, ho nasaun hala'o duodésimu hahú hosi loron 01
Janeiru no iha de'it dolar millaun 20 maka disponível iha kofre sira.
Ministru hosi Reforma Lejislativu
no Asuntu Parlamentar sira, Fidelis Magalhães, esplika ona ba Lusa katak
proposta lei tenki liuhosi parlamentu, tuir determina hosi Lei Fundu
Petrolíferu nian, no halo tuir kálkulu sira hosi rejimi duodesimal, ho millaun
70 resin fulan-fulan.
"Folin ne'e hanesan pedidu
autorizasaun estraordináriu ida hodi garanti finansiamentu Estadu nian. Tau
hamutuk ho millaun 20 ne'ebé maka disponível iha kofre sira no reseita
doméstiku sira [ne'ebé la'ós petrolíferu nian] no fó marjen ba Governu",
nia hatete ba Lusa.
"Nune'e ami sei garanti
pagamentu sira ne'ebé maka labele adia. Autorizasaun ne'e hotu bainhira hahú
hala'o Orsamentu Jeral foun Estadu nian ba tinan ne'e", nia hatete.
Ministru timoroan adianta ona
katak objetivu maka aprezenta orsamentu ba parlamentu "lalais tebes"
hafoin aprezentasaun hosi programa Governu nian - dokumentu ne'ebé tenki to'o
iha parlamentu to'o loron 22 Jullu.
Lei hosi Fundu Petrolíferu, fonte
prinsipal hosi reseita ba kofre sira Estadu nian, determina katak transferénsia
ruma presiza atu Governu aprezenta ba parlamentu relatóriu sira kona-ba kálkulu
hosi rendimentu sustentável iha tinan fiskal, nune'e mós sertifikasaun hosi
folin ne'e hosi auditor independente ida.
Primeiru-ministru, Taur Matan
Ruak, anunsia ona iha loron-tersa katak Governu sei aprova medida sira hodi
reforsa kofre sira Estadu nian durante fulan-Jullu ho fulan-Agostu.
"Governu daualuk preokupadu
hela ho saláriu sira, vensimentu sira no tusan sira ne'ebé tenki selu. Ha'u
garanti ona ba señór Prezidente katak ami sei ko'alia hodi iha osan hodi
sustenta mákina Estadu nian ba fulan-Jullu ho fulan-Agostu", hatete hosi
governante.
Iha loron-segunda ne'e koligasaun
Aliansa Mudansa ba Progresu (AMP), ne'ebé apoia Governu, afirma ona katak
Estadu laiha osan sufisiente ba "funsionamentu normal" iha fulan
ne'e.
Francisco Vasconcelos, deputadu
hosi Partidu Libertasaun Popular (PLP), partidu ida ne'ebé maka halo parte iha
AMP iha Parlamentu Nasional, indika ona katak kofre Estadu nian "iha de'it
osan hamutuk millaun 20 resin dolár norte-amerikanu nian".
"Estadu presiza osan millaun
80 resin hodi bele garanti nia funsionamentu normal, iha fulan-Jullu
ne'e", nia hatete iha sesaun plenáriu.
SAPO TL ho Lusa
Sem comentários:
Enviar um comentário