quarta-feira, 11 de julho de 2018

Xanana Gusmão ameasa PR timoroan ho demisaun tanba blokeiu ba membru sira Governu nian


Iha loron-tersa ne'e, líder hosi partidu boot koligasaun Governu nian iha Timor-Leste, Xanana Gusmão, ameasa ona hamosu prosesu demisaun ida hosi Prezidente Repúblika bainhira mantén nafatin "impedimentu sistemátiku no laiha fundamentu" ba membru sira Governu nian ne'ebé maka hato'o hosi primeiru-ministru.

Ameasa ne'e halo parte hosi karta ida ne'ebé nakonu ho krítika maka'as no akuzasaun sira ne'ebé maka prezidente hosi Congresso Nacional da Reconstrução Timorense (CNRT) entrega ona iha loron-tersa ne'e ba Prezidente Repúblika, Francisco Guterres Lu-Olo no ne'ebé maka Lusa iha asesu.

Gusmão konsidera katak xefe Estadu tenki "respeita prinsípiu hosi separasaun poder sira nian" no "respeitu ba autonomia Governu nian hanesan órgaun konstitusional soberanu, eziji solidariedade institusional no rekoñesimentu hosi Prezidente Repúblika hosi kompeténsia rasik no úniku hosi Primeiru-Ministru hodi hili membru sira hosi nia Governu".

Tanba ne'e, nia hakerek, "rejeisaun sistemátiku no lahó fundamentu, hosi Prezidente Repúblika, hosi naran sira titular sira ne'ebé maka hato'o hosi primeiru-ministru hodi halo parte iha Governu" tuir CNRT nia haree hanesan "tentativa ida hodi uza poder sira no, iha sentidu ne'e, konfigura iha "violasaun klaru ida no todan hosi nia obrigasaun konstitusional sira".
Xanana Gusmão asina karta ne'e nu'udar prezidente CNRT nian no dokumentu, ho karimbu partidu nian, haruka ona iha momentu ida tensaun maka'as entre Lu-Olo, primeiru-ministru Taur Matan Ruak ho Aliansa Mudansa ba Progresu (AMP), koligasaun ne'ebé manán lejislativu iha fulan-Maiu ho maioria absoluta - ne'ebé halo parte CNRT, PLP ho KHUNTO.

Lu-Olo rekuza nafatin hodi la fó pose ba grupu ida hosi membru sira Governu nian ne'ebé maka hato'o hosi Taur Matan Ruak, tanba deskonfia katak sira nia "naran identifika iha instánsia judisial kompetente sira" ka tanba iha "perfil étiku ne'ebé kontroversu".

Postura ne'e, ne'ebé laiha solusaun iha reuniaun oioin entre sira, halo bankada sira AMP nian iha Parlamentu, iha loron-segunda ne'e, nega ona pedidu autorizasaun ida hosi Lu-Olo hodi halo vizita Estadu ida ba Portugal - ne'ebé maka eziji hosi Konstituisaun - tanba sira responsabiliza Prezidente tanba problema ne'e.

AMP hatete mós katak Estadu laiha ona osan hodi halo nia funsionamentu normal, iha kofre iha de'it millaun 20 hosi millaun 80 ne'ebé maka presiza hodi selu saláriu, pensaun sira no serbisu importante sira, inklui diesel ba sentral elétriku sira iha nasaun.

Xanana Gusmão rekuza ona dala rua hodi simu pose, falta de'it elementu na'in sanulu resin ne'ebé bele asumi ho dalan formal sira nia knaar, no maioria ne'ebé maka la simu pose halo parte hosi CNRT.

Karta refere aplikasaun hosi artigu 75 hosi konstituisaun - kona-ba "responsabilidade kriminal no obrigasaun konstitusional sira" - ne'ebé esplika katak Prezidente "hatán hasoru Supremu Tribunal Justisa ba violasaun klaru no todan hosi nia obrigasaun konstitusional sira".

Inisiativu "iha Parlamentu Nasional nia liman, iha atensaun ba proposta hosi 1/5 no deliberasaun ne'ebé maka aprova hosi maioria hosi 2/3 hosi deputadu tomak" no bainhira iha kondenasaun ruma "implika demisaun hosi kargu no lakon posibilidade ba releisaun".

Pelumenus, agora daudaun, ameasa hanesan susar atu hala'o tanba medida ne'e karik sei susar hodi hetan apoiu hosi 2/3 hosi deputadu na'in 65, ka hosi na'in 43, númeru ne'ebé maka bankada sira ezekutivu nian la konsege hetan.

Maski halibur bankada tomak hosi parlamentu kontra Fretilin - Prezidente Repúblika nia partidu no ne'ebé maka kontrola fatin hamutuk 23 iha parlamentu - maibé númeru de'it hetan de'it fatin 42.

SAPO TL ho Lusa

Sem comentários: