Primeiru-ministru fiar katak diálogu ho Prezidente sei rezolve difikuldade polítika

Primeiru-ministru timoroan, iha loron-segunda ne'e, hatete katak fiar atu diálogu ho Prezidente sei rezolve difikuldade polítika iha Timor-Leste, ne'ebé mosu tanba atrazu iha tomada pose ba Governu foun.

"Ami senti fiar katak ho manutensaun no aprofundamentu hosi diálogu ne'ebé halo ona entre xefe Estadu ho xefe Gvoernu, kona-ba personalidade sira ne'ebé tenki nomeia hodi halo parte iha Governu, iha tempu badal ami sei ultrapasa difikuldade polítika atual no sei hakotu nomeasaun no pose ba membru sira seluk Governu nian", Taur Matan Ruak hatete iha Díli.

"Ha'u iha fiar katak iha kuadru normalidade konstitusional nian, ne'ebé maka ita hotu iha orgullu, no ho baze hosi prinsípiu sira respeitu ho lealdade institusional sira nian, xefe Estadu no xefe Governu sei halo nafatin diálogu hodi buka solusaun sira no kompromisu sira ne'ebé viável, lalais bainhira ami bele, hodi hakotu formasaun ba Governu Konstitusional daualuk nian", nia insisti.

Primeiru-ministru ko'alia iha Palásiu Prezidensial durante serimónia fó pose ba Filomeno Paixão, eis-númeru daruak hosi Forsa sira Defeza Timor-Leste nian (F-FDTL), nu'udar ministru Defeza ba Governu daualuk, iha serimónia ida iha Palásiu Prezidensial iha Díli, no bainhira falta fó pose elementu hosi ezekutivu hamutuk sanulu resin.

Formasaun hosi Governu daualuk iha hela problema, ho Lu-Olo rekuza fó pose ba membru na'in 11 ne'ebé nomeia hosi Aliansa Mudansa ba Progresu (AMP) no hosi primeiru-ministru, Taur Matan Ruak, na'in sia tanba karik sira nia naran "identifika iha instánsia judisial kompetente sira" no na'in rua tanba iha "perfil étiku ne'ebé kontroversu".

Iha loron-segunda ne'e, tuir loloos, simu pose Xanana Gusmão nu'udar ministru Estadu, konselleiru hosi primeiru-ministru no ministru Planeamentu no Investimentu Estratéjiku nian, Alfredo Pires nu'udar ministru Petróleu ho Mineral nian, no Rogério Araújo Mendonça nu'udar sekretáriu Estadu Peska nian.

Maibé, primeiru-ministru informa ona tuir dalan ofisial katak "tanba razaun polítika sira" maka Xanana Gusmão, Alfredo Pires ho Rogério Araújo Mendonça "sei la simu pose iha loron-segunda ne'e", refere hosi Lu-Olo. Ne'e hanesan ba dala rua maka Xanana Gusmão hetan nomeasaun nu'udar ministru, ho kompeténsia alargadu iha dekretu daruak ne'e, no la simu pose.

Matan Ruak rekorda katak sistema semiprezidensial "hanesan ezijente no tenki iha esforsu permanente ida hosi responsável polítika tomak" hodi ajuda rezolve problema sira ne'ebé mosu.

Ne'e hanesan espesial iha kazu hosi "sira ne'ebé hanesan titular hosi órgaun soberania sira nian no tenki buka halo diálogu, debate no hetan solusaun sira hosi kompromisu ne'ebé viabiliza funsionamentu Estadu nian no, nune'e, la impede dezenvolvimentu no hadi'a populasaun sira nia kondisaun moris", nia hatete.

"Demokrasia la determina atu ita hotu tenki iha ideia hanesan, opiniaun hanesan ka vizaun polítika hanesan kona-ba nasaun nia futuru. Maibé domin ne'ebé makaita tomak iha, lahó limitasaun, ba ita nia nasaun no povu, dezafia beibeik ita hodi buka konsensu no solusaun ekilibradu ne'ebé bele satisfaz interese públiku", nia afirma.

Kona-ba Paixão nia tomada pose, primeiru-ministru rekorda nia "méritu rekoñesidu iha serbisu sira ne'ebé hala'o ona (...) durante luta ba libertasaun nasional no durante kuaze tinan 20 resin iha konstrusaun hosi Forsa Defeza ida modernu, profisional ho efisiente, bele fó resposta ba dezafiu oioin hosi defeza internu no externu".

SAPO TL ho Lusa