quinta-feira, 5 de julho de 2018

MRLAP Iha Planu Uniforma Rejime Jurídiku

PARTILHAR

DILI, (TATOLI) – Governu liuhosi Ministériu Reforma Lejislativa no Asuntu Parlamentár (MRLAP) ne’ebé hanesan ministériu foun iha VIII governu konstitusionál iha planu uniforma rejime jurídiku.

“Ita hare oinsá atu uniforma rejime jurídiku ita nian ba lei sira ne’ebé ita hare kontradis ba malu, lei sira ne’ebé la favorese ba  dezenvolvimentu ekonómiku iha rai laran no iha dekretu balun mak kontra fali dekretu sira seluk”, tenik Ministru Fidelis Leite Magalhãeas ba jornalista sira iha Palásiu, ohin.

Nia hatutan nu’udar ministériu foun prioridade ida mak oinsá atu harii ministériu, tanba iha kuadrus ne’ebé hanesan servisu koorporál atu fó ba ministériu ne’e halo ninia polítika. Kuadrus hirak ne’e mak hanesan diresaun sira ne’ebé hola parte iha asuntu lejislativa no komisaun reforma lejislativa (KRL) ne’ebé durante ne’e eziste iha ministériu ninia okos.

Hodi rekoñese agora dadauk seidauk iha sistema no baze dadus ne’ebé mak di’ak ho fasíl atu buka no halo referénsia ba lei sira ne’ebé mak eziste ona bainhira ko’alia ba lei foun, dala ruma mós halo lei maibé antes iha ona, tanba ne’e MRLAP konsidera ida hanesan hanoin bot ne’ebé ministériu ne’e atu halo.

“Iha tempu ba oin mós ami hakarak halo lei sira ne’e bele reflete duni ita nia povu nia moris. Katak povu sente dehan lei ne’e la’os buat ida ne’ebé mak mai husi fatin seluk maibé mai husi ninia vida loron-loron tanba ne’e nia tenke komprende lei ne’e”, katak tan.

Nune’e nia iha esperansa, ho apóiu husi Sekretáriu Estadu Komunikasaun Sosiál (SEKOMS) ho orgaun komunikasaun sira, bele halo sensibilizasaun ba públiku sira konaba nia lei.

Governante ne’e akresenta dezafíu agora mak lei ho lian portugés, tanba ema balun servisu ba lei de’it dalaruma ladun komprende no intrepreta satán povu, tanba ne’e parte governu tenke esforsu liután atu bele sensibiliza.

“Ami hakarak responde preokupasaun sidadaun hotu nian, inklui sosiedade sivil no povu”, konklui.

Antes ne’e, VI Governu Konstitusionál ne’ebé lidera husi eis-Primeiru Ministru, Rui Maria de Araújo, liuhosi reuniaun Konsellu Ministru aprova komisaun reforma lejislativa.

Hafoin aprovasaun governu, prezidente no membru husi orgaun lejislativa ne’e simu pose iha loron 16 dezembru 2015 iha Palásiu Governu.

Haktuir iha pájina ofisiál governu, komisaun ne’e harii ho objetivu fó sai rekomendasaun sira ne’ebé importante no prepara relatóriu semestrál  ne’ebé ajuda governu iha reforma lejizlativa no reforma setór justisa nian.

Ho medida hakarak promove governasaun di’ak ne’ebé abranje ba hotu-hotu liuhusi enkuadramentu jurídiku ida koerente ho dinámika foun nasaun nian no regra  hirak  mundu adopta ne’ebé mak Timor-Leste tenke akompaña.

Jornalista: Julia Chatarina | Editora: Rita Almeida

Imajen: Ministru Reforma Lejislativa no Asiuntu Parlamentár, Fidelis Leite Magalhãeas. Imajen TATOLI/António Gonçalves
PARTILHAR

Author: verified_user

Publicação luso-timorense sem fins lucrativos

0 comentários: