Igreja Katólika Sai Mediadór Sei La Fó Efeitu

DILI, (TATOLI) - Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, la aseita Igreja Katóliku atu sai mediadór ba diálogu entre líder nasionál sira hanesan Xanana Gusmão, Marí Alkatiri, Lú Olo no Taur Matan Ruak tuir ema barak nia pedidu.

Tuir Lere katak Xanana, Lú Olo ho líder sira seluk la’ós tuku malu tan ne’e tenke iha mediadór para bele hadame sira maibé ne’e kestaun lei.

“Mediadór para tau tiha lei iha gaveta laran depois sira diálogu ne’e oin seluk. Maibé, se lei dehan hanesan ne’e maka ita la halo tuir mós sala. Tan ne’e, Igreja Katólika bele sai mediadór mós sei la fó efeitu.  Importante maka líder istóriku na’in hira tenke iha konsiénsia, iha morál, katak tenke hatudu dalan di’ak ba eroi sira ne’ebé mate ona no sira ne’ebé sei moris,” nia dehan ba jornalista sira iha Palásiu Prezidente Nicolau Lobato, Bairru Pité, Dili, sesta ne’e, relasiona ho opiniaun públiku ne’ebé sujere atu Igreja Katólika sai mediadór ba líder sira atu hakotu impase polítika.

Lere afirma katak líder istóriku na’in hira ne’e la’ós tanba hadau malu buat ruma, maibé hotu-hotu preokupa oinsá lori dezenvolvimentu ba povu.

“Sira hotu-hotu tau interese nasionál. Hotu-hotu preokupa oinsá lori dezenvolvimentu ba povu maibé buat hotu-hotu lei maka manda, katak, se Prezidente Repúblika veta orsamentu jerál Estadu (OJE) mós veta tuir lei no la veta mós tenke tuir lei,” líder rezisténsia ne’e subliña.

Nia hatutan, divulgasaun orsamentu veta ka la veta ne’e problema polítiku no problema ba órgaun kompetente sira nian. Tantu F-FDTL no PNTL laiha buat ida atu tama ba iha área ida ne’e maibé devér maka halo seguransa.

Jornalista: Xisto Freitas | Editór: Manuel Pinto

Imajen: Lere Anan Timur