terça-feira, 15 de janeiro de 2019

Sergio Hornay Eleitu Nu’udar Komisáriu KAK


DILI, (TATOLI) – Defensór Públiku, Sergio Hornay, eleitu nu’udar Komisáriu Komisaun Anti Korrupsaun (KAK) liuhosi votasaun parlamentár ho votu a favor 42, kontra 13 no abstensaun rua.

“Kandidatu, Sergio Hornay, ohin eleje ona nia funsaun nu’udar Komisáriu Komisaun Anti Korupsaun ho votu maioria simples”, Vise Prezidente Parlamentu Nasionál, Maria Angelina Sarmento, ba jornalista sira hafoin votasaun iha uma fukun, ohin.

Atu fó pose ba Komisáriu KAK, Vise Prezidente Parlamentu dehan seidauk hatene kona-ba bainhira mak akontese. Tanba ida ne’e kompeténsia governu nian.

Proposta nomeasaun kandidatu mai hosi governu. Tanba ne’e mak asuntu pose ida ne’e kompeténsia governu nian. Parlamentu nia kna’ar mak halo votasaun.

Enkuantu, iha termu artigu 191, númeru 2 kona-ba rejimentu parlamentár, deklara asuntu kandidatura hodi okupa kargu Komisáriu KAK.

Entretantu, kandidatu Komisáriu KAK, tinan kotuk governu propoin kandidatura rua mak kandidatu Aderito Tilman ne’ebé ho nia mandatu hotu ona iha tinan kotuk, nune’e mós Defensór Públiku, Sergio Hornay.

Maibé ikus mai, antigu prokuradór, Aderito Tilman, hato’o karta ba Parlamentu Nasionál hodi deklara nia mandatu nu’udar Komisáriu KAK termina ona, no deside fila fali hodi asume nu’udar Prokuradór iha Prokuradória Jerál Repúblika Timor-Leste.

Nune’e ikus mai, Sergio Hornay sai kandidatu úniku iha ámbitu votasaun.

Jornalista: Zezito Silva | Editora: Rita Almeida

Imajen: Eis Defenfór Públiku, Sergio Hornai

Sem comentários: